നിയമസഭാ തിരഞ്ഞെടുപ്പ് ഫലം പുറത്തുവന്ന് ദിവസങ്ങൾ പിന്നിട്ടിട്ടും കേരളത്തിന്റെ പുതിയ മുഖ്യമന്ത്രി ആരായിരിക്കുമെന്ന കാര്യത്തിൽ കോൺഗ്രസിൽ അനിശ്ചിതത്വം തുടരുന്നു. പാർട്ടിയിലെ മുഖ്യമന്ത്രി സ്ഥാനത്തെച്ചൊല്ലിയുള്ള തർക്കം ഓരോ ദിവസം കഴിയുന്തോറും കൂടുതൽ രൂക്ഷമാവുകയാണ്. കണ്ണൂർ വിമാനത്താവളത്തിൽ മാധ്യമങ്ങളെ കണ്ട കെപിസിസി നേതാവ് സണ്ണി ജോസഫിന് പോലും ഇക്കാര്യത്തിൽ കൃത്യമായ മറുപടി നൽകാൻ സാധിച്ചില്ല.
മുഖ്യമന്ത്രിയെ എപ്പോൾ പ്രഖ്യാപിക്കുമെന്ന മാധ്യമപ്രവർത്തകരുടെ ചോദ്യത്തിന് 'നോക്കാമെന്ന' മറുപടിയാണ് സണ്ണി ജോസഫ് നൽകിയത്. ഹൈക്കമാൻഡ് തലത്തിൽ ചർച്ചകൾ നടക്കുന്നുണ്ടെന്നും വിവാദങ്ങൾ ഒഴിവാക്കാനാണ് ശ്രമമെന്നും അദ്ദേഹം വ്യക്തമാക്കി. രാഹുൽ ഗാന്ധിയും മല്ലികാർജുൻ ഖാർഗയും ചേർന്ന് മുഖ്യമന്ത്രിയെ പ്രഖ്യാപിക്കുമെന്നും, ഹൈക്കമാൻഡിന് ഇക്കാര്യത്തിൽ വ്യക്തമായ മാനദണ്ഡങ്ങൾ ഉണ്ടെന്നും അദ്ദേഹം കൂട്ടിച്ചേർത്തു.
അതേസമയം, നേതാക്കൾക്കിടയിൽ സമവായം ഉണ്ടാക്കാൻ കഴിയാത്തതാണ് തീരുമാനങ്ങൾ വൈകാൻ കാരണം. മാരത്തൺ ചർച്ചകൾ നടന്നിട്ടും അന്തിമ തീരുമാനത്തിൽ എത്താൻ പാർട്ടിക്ക് സാധിച്ചിട്ടില്ല. കെ.സി. വേണുഗോപാലിന് ചർച്ചകളിൽ മുൻതൂക്കം ലഭിക്കുമ്പോഴും, വി.ഡി. സതീശൻ തന്റെ നിലപാടുകളിൽ ഉറച്ചുനിൽക്കുകയാണ്. മുഖ്യമന്ത്രി സ്ഥാനം ലഭിച്ചില്ലെങ്കിൽ മന്ത്രിസഭയിലേക്ക് ഇല്ലെന്നും, ആവശ്യമെങ്കിൽ എം.എൽ.എ സ്ഥാനം രാജിവെക്കുമെന്നുമുള്ള കടുത്ത നിലപാടാണ് സതീശൻ സ്വീകരിച്ചിരിക്കുന്നത്. ഈ പ്രതിസന്ധി കോൺഗ്രസ് പ്രവർത്തകർക്കിടയിലും വലിയ നിരാശയാണ് പടർത്തുന്നത്.
Photo and News Source: Kairali News
