കേരളത്തിലെ നിയമസഭാ തെരഞ്ഞെടുപ്പിൽ എൽഡിഎഫിന് നേരിട്ട തിരിച്ചടിയെക്കുറിച്ച് പാർട്ടി തലത്തിൽ വിശദമായ പരിശോധന നടത്തുമെന്ന് സിപിഐഎം പൊളിറ്റ് ബ്യൂറോ അംഗം എം.എ. ബേബി വ്യക്തമാക്കി. പോളിറ്റ് ബ്യൂറോ യോഗത്തിന് ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. സംസ്ഥാനത്ത് ബിജെപി മൂന്ന് സീറ്റുകൾ നേടിയത് ഗൗരവകരമായ വിഷയമാണെന്നും, എന്നാൽ ഈ മണ്ഡലങ്ങളിൽ ഇടതുപക്ഷം ശക്തമായ പോരാട്ടമാണ് കാഴ്ചവെച്ചതെന്നും അദ്ദേഹം ചൂണ്ടിക്കാട്ടി.
തെരഞ്ഞെടുപ്പ് പരാജയത്തിന്റെ ഉത്തരവാദിത്തം മുഖ്യമന്ത്രി പിണറായി വിജയൻ മാത്രം ഏറ്റെടുക്കേണ്ടതില്ലെന്നും, പാർട്ടി കൂട്ടായാണ് തെരഞ്ഞെടുപ്പിനെ നേരിട്ടതെന്നും അദ്ദേഹം പറഞ്ഞു. പരാജയത്തെക്കുറിച്ച് തിടുക്കത്തിൽ നിഗമനങ്ങളിൽ എത്താതെ, പാർട്ടിയുടെ എല്ലാ ഘടകങ്ങളിലും ചർച്ചകൾ നടത്തുമെന്നും അനുഭാവികളുടെ അഭിപ്രായങ്ങൾ കൂടി കേൾക്കുമെന്നും അദ്ദേഹം കൂട്ടിച്ചേർത്തു. യുഡിഎഫ് ഇപ്പോൾ ഐക്യമില്ലാത്ത മുന്നണിയായി മാറിയെന്നും, തെരഞ്ഞെടുപ്പിന് ശേഷം കോൺഗ്രസിനുള്ളിലെ തർക്കങ്ങൾ ഇതിന് തെളിവാണെന്നും അദ്ദേഹം പരിഹസിച്ചു.
രാജ്യത്തെ തെരഞ്ഞെടുപ്പ് കമ്മീഷന്റെ വിശ്വാസ്യത നഷ്ടപ്പെട്ടുവെന്ന് കുറ്റപ്പെടുത്തിയ എം.എ. ബേബി, ബംഗാളിലെ തെരഞ്ഞെടുപ്പ് ഫലത്തെക്കുറിച്ചും പ്രതികരിച്ചു. തൊഴിലാളി വിരുദ്ധമായ ലേബർ കോഡുകൾ നടപ്പിലാക്കുന്ന കേന്ദ്ര സർക്കാർ നടപടിക്കെതിരെയും അദ്ദേഹം രൂക്ഷ വിമർശനം ഉന്നയിച്ചു. നോയിഡയിലെ തൊഴിലാളി സമരങ്ങൾ ഇതിന്റെ ഭാഗമാണെന്നും അദ്ദേഹം പറഞ്ഞു.
പ്രധാനമന്ത്രി നരേന്ദ്ര മോദിയുടെ വിദേശയാത്രകൾ ഒഴിവാക്കണമെന്ന നിർദ്ദേശത്തെയും അദ്ദേഹം പരിഹസിച്ചു. പാചകവാതക പ്രതിസന്ധിക്ക് കാരണം കേന്ദ്ര സർക്കാരിന്റെ വീഴ്ചയാണെന്നും അദ്ദേഹം ആരോപിച്ചു. മണ്ഡല പുനർനിർണയം വഴി ദക്ഷിണേന്ത്യയുടെ പ്രാധാന്യം കുറയ്ക്കാനാണ് കേന്ദ്രം ശ്രമിക്കുന്നതെന്നും, ഇത് ആർഎസ്എസ് സ്വാധീനമുള്ള മേഖലകളിൽ സീറ്റുകൾ വർധിപ്പിക്കാൻ ലക്ഷ്യമിട്ടുള്ളതാണെന്നും എം.എ. ബേബി കൂട്ടിച്ചേർത്തു.
Photo and News Source: Kairali News
