ആഗോള വിപണിയിലെ അനിശ്ചിതത്വങ്ങളും ഇന്ധനവിലയിലെ കുതിപ്പും ഇന്ത്യയുടെ സാമ്പത്തിക സുസ്ഥിരതയ്ക്ക് വലിയ വെല്ലുവിളിയാണ് ഉയർത്തുന്നത്. രാജ്യത്തിന്റെ ഊർജ്ജ ആവശ്യകതയുടെ 40 ശതമാനവും ഇറക്കുമതിയെ ആശ്രയിച്ചാണ് മുന്നോട്ട് പോകുന്നത്. ക്രൂഡ് ഓയിലിനായി മാത്രം പ്രതിവർഷം 12.80 ലക്ഷം കോടി രൂപയാണ് ഇന്ത്യ ചെലവഴിക്കുന്നത്. ഈ സാഹചര്യത്തിൽ, ഇന്ധന ഉപഭോഗം കുറയ്ക്കാനും പൊതുഗതാഗതം പ്രോത്സാഹിപ്പിക്കാനും വർക്ക് ഫ്രം ഹോം രീതികൾ സ്വീകരിക്കാനും പ്രധാനമന്ത്രി നരേന്ദ്ര മോദി ആഹ്വാനം ചെയ്തിരുന്നു.
ഇറക്കുമതിയെ ആശ്രയിക്കുന്നത് കുറയ്ക്കുന്നതിനായി ഗ്രീൻ ഹൈഡ്രജൻ, ആണവോർജ്ജ സാങ്കേതികവിദ്യകൾ എന്നിവയിൽ രാജ്യം വലിയ പ്രതീക്ഷയാണ് വെക്കുന്നത്. നാഷണൽ ഗ്രീൻ ഹൈഡ്രജൻ മിഷനിലൂടെ 2030-ഓടെ 50 ലക്ഷം മെട്രിക് ടൺ ഗ്രീൻ ഹൈഡ്രജൻ ഉത്പാദിപ്പിക്കാനാണ് സർക്കാർ ലക്ഷ്യമിടുന്നത്. ഇത് വളം, സ്റ്റീൽ, ഗതാഗതം തുടങ്ങിയ മേഖലകളിൽ ഫോസിൽ ഇന്ധനങ്ങൾക്ക് പകരമായി ഉപയോഗിക്കുന്നതിലൂടെ പ്രതിവർഷം ഒരു ലക്ഷം കോടി രൂപയുടെ ഇറക്കുമതി ചെലവ് ലാഭിക്കാൻ സാധിക്കുമെന്നാണ് കണക്കാക്കപ്പെടുന്നത്.
ആണവോർജ്ജ മേഖലയിൽ കൽപ്പാക്കത്തെ പ്രോട്ടോടൈപ്പ് ഫാസ്റ്റ് ബ്രീഡർ റിയാക്ടർ (PFBR) പ്രവർത്തനക്ഷമമായത് വലിയൊരു നാഴികക്കല്ലാണ്. ഉപയോഗിക്കുന്നതിനേക്കാൾ കൂടുതൽ ഇന്ധനം ഉത്പാദിപ്പിക്കാൻ കഴിയുന്ന ഈ സാങ്കേതികവിദ്യ ഇന്ത്യയുടെ തോറിയം ശേഖരം പ്രയോജനപ്പെടുത്താൻ സഹായിക്കും. കൂടാതെ, സ്മോൾ മോഡുലാർ റിയാക്ടറുകൾ (SMR) വികസിപ്പിക്കുന്നതിനായി 20,000 കോടി രൂപ സർക്കാർ നീക്കിവെച്ചിട്ടുണ്ട്. ഭാരത് സ്മോൾ മോഡുലാർ റിയാക്ടർ (BSMR-200) പോലുള്ള നൂതന സാങ്കേതികവിദ്യകൾ ഭാവിയിൽ ഇന്ത്യയുടെ ഊർജ്ജ സുരക്ഷ ഉറപ്പാക്കുന്നതിൽ നിർണ്ണായക പങ്ക് വഹിക്കും.
Photo and News Source: Dhanam
