ഇരുന്നൂറുകോടി രൂപയുടെ സാമ്പത്തിക തട്ടിപ്പുകേസിൽ മാപ്പുസാക്ഷിയാകാൻ നടി ജാക്വിലിൻ ഫെർണാണ്ടസ് നൽകിയ അപേക്ഷ എൻഫോഴ്സ്മെന്റ് ഡയറക്ടറേറ്റ് (ഇഡി) തള്ളി. കുപ്രസിദ്ധ തട്ടിപ്പുകാരൻ സുകേഷ് ചന്ദ്രശേഖർ ഉൾപ്പെട്ട കേസിലാണ് നടി ഇത്തരമൊരു ആവശ്യം ഉന്നയിച്ചത്. എന്നാൽ, നടിക്കെതിരെ ശക്തമായ തെളിവുകളുണ്ടെന്നും അന്വേഷണവുമായി അവർ സഹകരിക്കുന്നില്ലെന്നും ചൂണ്ടിക്കാട്ടി ഇഡി കോടതിയിൽ ഇതിനെ ശക്തമായി എതിർത്തു. ഇഡിയുടെ നിലപാടിൽ ചൊവ്വാഴ്ച വൈകിട്ട് നാലുമണിക്കുള്ളിൽ മറുപടി നൽകാൻ നടിയുടെ അഭിഭാഷകനോട് കോടതി നിർദ്ദേശിച്ചു.
താൻ നിരപരാധിയാണെന്നും സുകേഷ് ചന്ദ്രശേഖർ നൽകിയ സമ്മാനങ്ങൾ ക്രിമിനൽ പശ്ചാത്തലമുള്ളതാണെന്ന് തനിക്ക് അറിയില്ലായിരുന്നുവെന്നുമാണ് ജാക്വിലിൻ വാദിക്കുന്നത്. എന്നാൽ, കള്ളപ്പണം വെളുപ്പിക്കലിൽ നടിക്കും പങ്കുണ്ടെന്നും കുറ്റകൃത്യത്തിലൂടെ ലഭിച്ച വരുമാനത്തിന്റെ പ്രധാന ഗുണഭോക്താവാണ് അവരെന്നും ഇഡി കോടതിയിൽ വ്യക്തമാക്കി. സുകേഷിന്റെ ക്രിമിനൽ പശ്ചാത്തലത്തെക്കുറിച്ച് കൃത്യമായ അറിവുണ്ടായിരുന്നിട്ടും നടി വിലയേറിയ സമ്മാനങ്ങൾ സ്വീകരിക്കുകയും സുകേഷുമായി നിരന്തരം ആശയവിനിമയം നടത്തുകയും ചെയ്തിരുന്നുവെന്ന് അന്വേഷണ ഏജൻസി ചൂണ്ടിക്കാട്ടുന്നു.
നടിയെ മാപ്പുസാക്ഷിയാക്കുന്നത് നീതിന്യായ സംവിധാനത്തിന്റെ വിശ്വാസ്യതയെ ബാധിക്കുമെന്നും കുറ്റകൃത്യത്തിന്റെ ഗൗരവം കുറയ്ക്കുമെന്നും ഇഡി വാദിച്ചു. അന്വേഷണത്തോട് സഹകരിക്കാതെ സത്യസന്ധമായ മൊഴി നൽകാൻ നടി വിസമ്മതിച്ചതും ഇഡി കോടതിയുടെ ശ്രദ്ധയിൽപ്പെടുത്തി. ഫോർട്ടിസ് ഹെൽത്ത് കെയർ പ്രമോട്ടറായ ശിവീന്ദർ സിങ്ങിന്റെ കുടുംബത്തിൽനിന്ന് 200 കോടി രൂപ തട്ടിയെടുത്ത കേസിലാണ് സുകേഷ് ചന്ദ്രശേഖർ അറസ്റ്റിലായത്. ഈ കേസുമായി ബന്ധപ്പെട്ട അന്വേഷണത്തിലാണ് ജാക്വിലിൻ ഫെർണാണ്ടസിന് സുകേഷുമായുള്ള ബന്ധവും അവർ കോടിക്കണക്കിന് രൂപയുടെ സമ്മാനങ്ങൾ കൈപ്പറ്റിയതും പുറത്തുവന്നത്.
Photo and News Source: Mathrubhumi
