കേരളത്തിൽ ഭരണമാറ്റത്തിന് പിന്നാലെ ഉദ്യോഗസ്ഥരെ അന്യായമായി സ്ഥലം മാറ്റുന്ന നടപടികൾക്കെതിരെ എൻജിഒ യൂണിയൻ പ്രതിഷേധവുമായി രംഗത്ത്. മാനദണ്ഡങ്ങൾ കാറ്റിൽ പറത്തിക്കൊണ്ട് ജീവനക്കാരെ തലങ്ങും വിലങ്ങും സ്ഥലം മാറ്റുന്ന സർക്കാർ നടപടിയിൽ കടുത്ത പ്രതിഷേധമാണ് യൂണിയൻ രേഖപ്പെടുത്തുന്നത്. പുതിയ സർക്കാർ അധികാരമേൽക്കുന്നതിന് മുൻപ് തന്നെ ഇത്തരത്തിൽ പ്രതികാര നടപടികൾ സ്വീകരിക്കുന്നത് ഉദ്യോഗസ്ഥർക്കിടയിൽ വലിയ ആശങ്ക സൃഷ്ടിച്ചിട്ടുണ്ട്.
ഈ വിഷയത്തിൽ എൻജിഒ യൂണിയൻ ആലപ്പുഴ ജില്ലാ കമ്മിറ്റിയുടെ നേതൃത്വത്തിൽ ആലപ്പുഴ ജില്ലാ രജിസ്ട്രാർ ഓഫീസിന് മുന്നിൽ ശക്തമായ പ്രതിഷേധ പ്രകടനം സംഘടിപ്പിച്ചു. പ്രതിഷേധത്തെ തുടർന്ന് നടന്ന യോഗം എൻജിഒ യൂണിയൻ ജില്ലാ സെക്രട്ടറി ബൈജു പ്രസാദ് ഉദ്ഘാടനം ചെയ്തു. യൂണിയൻ ജില്ലാ പ്രസിഡന്റ് എൻ. അരുൺ കുമാർ അധ്യക്ഷത വഹിച്ച യോഗത്തിൽ സംസ്ഥാന കമ്മിറ്റി അംഗം സി. സിലീഷ്, ജില്ലാ വൈസ് പ്രസിഡന്റ് ജി. രാജേഷ്, ജില്ലാ ജോയിന്റ് സെക്രട്ടറി സി.സി. നയനൻ എന്നിവർ സംസാരിച്ചു.
നിയമസഭാ തെരഞ്ഞെടുപ്പിൽ യുഡിഎഫ് ഭൂരിപക്ഷം നേടിയതിന് പിന്നാലെയാണ് ഇത്തരത്തിലുള്ള നടപടികൾ ആരംഭിച്ചതെന്ന് യൂണിയൻ ആരോപിക്കുന്നു. കോൺഗ്രസിനുള്ളിലെ അധികാര തർക്കങ്ങളും മുഖ്യമന്ത്രിയെ തീരുമാനിക്കാനുള്ള കാലതാമസവും തുടരുന്നതിനിടയിലാണ് ഒരു വിഭാഗം ഉദ്യോഗസ്ഥർക്കെതിരെ ഇത്തരത്തിൽ പ്രതികാര നടപടികൾ സ്വീകരിക്കുന്നത്. ഭരണപരമായ കാര്യങ്ങളിൽ വ്യക്തത വരുത്തുന്നതിന് പകരം ഉദ്യോഗസ്ഥരെ ലക്ഷ്യം വെക്കുന്ന നടപടികൾക്കെതിരെ ശക്തമായ പ്രക്ഷോഭ പരിപാടികളുമായി മുന്നോട്ട് പോകാനാണ് എൻജിഒ യൂണിയന്റെ തീരുമാനം.
Photo and News Source: Kairali News
