ബെംഗളൂരുവിൽ ബുധാഴ്ച രാത്രി പെയ്ത കനത്ത മഴയെത്തുടർന്ന് ചർച്ച് സ്ട്രീറ്റിലെ ‘ബുക്ക് വേം’ പുസ്തകശാലയില് വെള്ളം കയറിയതോടെ വില്പനയ്ക്കായി ഒരുക്കിയിരുന്ന അയ്യായിരത്തോളം പുസ്തകങ്ങള് നശിച്ചു. വേനലവധി സീസണില് കുട്ടികളുടെയും മുതിര്ന്നവരുടെയും പ്രിയപ്പെട്ട പുതിയ പുസ്തകങ്ങളായിരുന്നു ഭൂരിഭാഗവും. വെള്ളത്തില് ഒഴുകിയ പുസ്തകങ്ങളുടെയും പരിസരത്ത് വീണുകിടന്ന ആലിപ്പഴങ്ങളുടെയും ദൃശ്യങ്ങള് സോഷ്യല് മീഡിയയില് വൈറലായി. ജനപ്രിയ ചിത്രകഥാ പുസ്തകങ്ങളായ ഓയില് പേപ്പറില് അച്ചടിച്ച ആസ്റ്ററിക്സ്, ഒബലിക്സ് തുടങ്ങിയവ പൂര്ണ്ണമായും നശിച്ചു.
വെള്ളം പുസ്തകങ്ങളുടെ കടലാസ് ഗുണമേന്മയെ ബാധിക്കുകയും ഒട്ടിപ്പോകാന് ഇടയാക്കുകയും ചെയ്തു. ഭാഗികമായി നനഞ്ഞ പുസ്തകങ്ങള് ഉണക്കി വായനക്കാര്ക്ക് കുറഞ്ഞ വിലയില് നല്കാന് അധികൃതര് ശ്രമിക്കുന്നുണ്ട്. കൊല്ക്കത്തയിലെ കോളേജ് സ്ട്രീറ്റിലെ ‘വെറ്റ് ബുക്ക് ഫെയര്’ മാതൃകയില് നനഞ്ഞ പുസ്തകങ്ങള് ഏറ്റെടുക്കാനും പിന്തുണ അറിയിച്ചിട്ടുണ്ട്. സമൂഹമാധ്യമങ്ങളിലൂടെ വായനക്കാരുടെ പ്രിയപ്പെട്ട പുസ്തകശാലയെ കരകയറ്റാനുള്ള ശ്രമം തുടരുന്നു. ‘പുസ്തകങ്ങളുടെ അവസ്ഥ എന്തുതന്നെയായാലും അവ വാങ്ങാന് ഞങ്ങള് തയ്യാറാണ്’ എന്നാണ് പലരുടെയും പ്രതികരണം.
പുസ്തകശാലയുടെ തിരിച്ചുവരവിന് വായനക്കാരുടെ പിന്തുണ നിർബന്ധമാണ്.
Photo and News Source: Janam TV
