കർണാടകയിലെ വിദ്യാഭ്യാസ സ്ഥാപനങ്ങളിൽ ക്ലാസ് മുറികളിൽ ശിരോവസ്ത്രം അഥവാ ഹിജാബ് ധരിക്കുന്നതിന് മുൻ ബി.ജെ.പി സർക്കാർ ഏർപ്പെടുത്തിയിരുന്ന നിരോധനം കോൺഗ്രസ് സർക്കാർ ഔദ്യോഗികമായി പിൻവലിച്ചു. 2022-ൽ പുറപ്പെടുവിച്ച വിവാദ ഉത്തരവാണ് ഇപ്പോൾ റദ്ദാക്കപ്പെട്ടിരിക്കുന്നത്. വിദ്യാർഥിനികൾക്ക് അവരുടെ പരമ്പരാഗതവും ആചാരാധിഷ്ഠിതവുമായ വസ്ത്രധാരണ രീതികൾ പിന്തുടരാൻ അനുമതി നൽകുന്നതാണ് പുതിയ സർക്കാർ ഉത്തരവ്.
2022 ഫെബ്രുവരിയിലാണ് മുൻ ബി.ജെ.പി സർക്കാർ ക്ലാസ് മുറികളിൽ ഹിജാബ് ധരിക്കുന്നത് നിരോധിച്ചുകൊണ്ട് ഉത്തരവിറക്കിയത്. മുസ്ലിം പെൺകുട്ടികളുടെ വസ്ത്രധാരണം വിദ്യാഭ്യാസ സ്ഥാപനങ്ങളുടെ യൂനിഫോം ചട്ടങ്ങൾക്ക് വിരുദ്ധമാണെന്ന് ചൂണ്ടിക്കാട്ടിയായിരുന്നു ഈ നടപടി. ഇത് വലിയ വിവാദങ്ങൾക്കും പ്രതിഷേധങ്ങൾക്കും വഴിവെച്ചിരുന്നു. വിദ്യാർഥികൾ തങ്ങളുടെ സ്കൂളുകളോ കോളജുകളോ നിർദ്ദേശിക്കുന്ന യൂനിഫോം കർശനമായി പാലിക്കണമെന്നായിരുന്നു അന്നത്തെ സർക്കാരിന്റെ നിലപാട്.
ഈ നിരോധനം പിൻവലിക്കണമെന്നത് ഉൾപ്പെടെയുള്ള വിവിധ വാഗ്ദാനങ്ങൾ കോൺഗ്രസ് പാർട്ടി മുസ്ലിം സമുദായത്തിന് നൽകിയിരുന്നു. എന്നാൽ, അധികാരത്തിൽ വന്ന് മൂന്ന് വർഷമായിട്ടും ഈ വാഗ്ദാനങ്ങൾ പാലിക്കാത്തതിൽ പ്രതിഷേധിച്ച് ശനിയാഴ്ച ബംഗളൂരുവിൽ വലിയൊരു മുസ്ലിം സമ്മേളനം നടക്കാനിരിക്കെയാണ് സർക്കാർ ഈ നിർണ്ണായക തീരുമാനമെടുത്തത് എന്നത് ശ്രദ്ധേയമാണ്. സമ്മേളനത്തിന് മുന്നോടിയായുള്ള ഈ നീക്കം രാഷ്ട്രീയ വൃത്തങ്ങളിൽ വലിയ ചർച്ചയായിട്ടുണ്ട്.
Photo and News Source: Sathyam Online
