ജാമിഅതുല് ഹിന്ദ് അല്ഇസ്ലാമിയ്യക്കു കീഴിലുള്ള മുന്നൂറിലധികം വിദ്യാഭ്യാസ സ്ഥാപനങ്ങളിലേക്കുള്ള ഏകജാലക പ്രവേശനത്തിനായുള്ള രണ്ടാം അലോട്മെന്റ് ഇന്ന് പ്രസിദ്ധീകരിക്കും. ഏഴ്, എട്ട് ക്ലാസ്സുകളിലേക്കുള്ള പ്രവേശനത്തിനായി ജെ-സാറ്റ് (J-SAT) പരീക്ഷ എഴുതിയ വിദ്യാര്ഥികള്ക്കാണ് ഈ അലോട്മെന്റ് ബാധകമാകുന്നത്. ഔദ്യോഗിക വെബ്സൈറ്റായ https://jamiathulhind.com/ വഴി വിദ്യാര്ഥികള്ക്ക് അലോട്മെന്റ് വിവരങ്ങള് പരിശോധിക്കാവുന്നതാണ്.
അലോട്മെന്റ് ലഭിച്ചവര് ഈ മാസം 15-ാം തീയതിക്കുള്ളില് തന്നെ അഡ്മിഷന് നടപടികള് പൂര്ത്തിയാക്കേണ്ടതാണ്. ഒന്നാം അലോട്മെന്റില് സീറ്റ് ലഭിച്ചിട്ടും ഇതുവരെ പ്രവേശനം നേടാത്തവര്ക്കും 15 വരെ അവസരമുണ്ട്. നിശ്ചിത സമയപരിധിക്കുള്ളില് അഡ്മിഷന് എടുക്കാത്ത പക്ഷം ലഭിച്ച അവസരം നഷ്ടപ്പെടുമെന്ന് അധികൃതര് മുന്നറിയിപ്പ് നല്കി.
രണ്ട് അലോട്മെന്റുകളിലും സീറ്റ് ലഭിക്കാത്ത വിദ്യാര്ഥികള്ക്കായി മെയ് 16-ന് സ്പോട്ട് അഡ്മിഷന് സൗകര്യം ഒരുക്കിയിട്ടുണ്ട്. ജാമിഅതുല് ഹിന്ദ് ഓഫീസുമായി നേരിട്ട് ബന്ധപ്പെട്ടാണ് ഇതിനുള്ള അവസരം പ്രയോജനപ്പെടുത്തേണ്ടത്. അതേസമയം, പ്ലസ് വണ് പ്രവേശനത്തിനായുള്ള ജെ-സാറ്റ് അലോട്മെന്റ് എസ്.എസ്.എല്.സി ഫലപ്രഖ്യാപനത്തിന് ശേഷമായിരിക്കും പ്രസിദ്ധീകരിക്കുക.
പുതിയ അധ്യയന വര്ഷത്തെ ക്ലാസുകള് മെയ് 18-ന് ആരംഭിക്കുമെന്ന് വൈസ് ചാന്സലര് കാന്തപുരം എ.പി. അബൂബക്കര് മുസ്ലിയാരുടെ നേതൃത്വത്തില് ചേര്ന്ന യോഗം അറിയിച്ചു. പ്രവേശനം സംബന്ധിച്ച കൂടുതല് വിവരങ്ങള്ക്കും അലോട്മെന്റ് പരിശോധിക്കുന്നതിനും വിദ്യാര്ഥികള് ജാമിഅതുല് ഹിന്ദിന്റെ ഔദ്യോഗിക വെബ്സൈറ്റ് സന്ദര്ശിക്കേണ്ടതാണ്.
Photo and News Source: Siraj Live
