കോലഞ്ചേരി ഐരാപുരം റബർ പാർക്ക് നുസ്രത്ത് നഗർ അങ്കണവാടിയിൽ നിന്ന് 42 വർഷത്തെ ദീർഘകാല സേവനത്തിന് ശേഷം വിരമിച്ച കാർത്യായനി ടീച്ചർക്ക് നാടിന്റെ സ്നേഹാദരം. ഐരാപുരം കമ്മ്യൂണിറ്റി ഹാളിൽ സംഘടിപ്പിച്ച വിപുലമായ അനുമോദന ചടങ്ങിൽ നിരവധി പേർ പങ്കെടുത്തു.
മഴുവന്നൂർ പഞ്ചായത്ത് പ്രസിഡന്റ് മിനി ചടങ്ങ് ഔദ്യോഗികമായി ഉദ്ഘാടനം ചെയ്തു. പി.ആർ. മണി അധ്യക്ഷത വഹിച്ച യോഗത്തിൽ, വടവുകോട് ബ്ലോക്ക് പഞ്ചായത്ത് പ്രസിഡന്റ് അമൃത സനൂപ് കാർത്യായനി ടീച്ചർക്ക് ഉപഹാരങ്ങൾ സമർപ്പിച്ചു. നീണ്ട നാല് പതിറ്റാണ്ടിലേറെക്കാലം അങ്കണവാടി അധ്യാപികയായി സേവനമനുഷ്ഠിച്ച ടീച്ചറുടെ പ്രവർത്തനങ്ങളെ ചടങ്ങിൽ പങ്കെടുത്തവർ പ്രത്യേകം അനുസ്മരിച്ചു.
വാർഡ് മെമ്പർമാരായ അഷ്റഫ്, എം.പി. റെജി, നളിനി മോഹനൻ, കൊച്ച അഹമ്മദ് എന്നിവർ ചടങ്ങിൽ സംസാരിച്ചു. അങ്കണവാടിയിലെ കുട്ടികൾക്കും രക്ഷിതാക്കൾക്കും നാട്ടുകാർക്കും പ്രിയങ്കരിയായ ടീച്ചറുടെ വിരമിക്കൽ ചടങ്ങ് ഏറെ വൈകാരികമായാണ് നടന്നത്.
Photo and News Source: Kerala Kaumudi
