റായ്പൂരിൽ നടന്ന ഐപിഎൽ മത്സരത്തിൽ മുംബൈ ഇന്ത്യൻസിനെതിരെ റോയൽ ചലഞ്ചേഴ്സ് ബംഗളൂരുവിന് (RCB) 167 റൺസ് വിജയലക്ഷ്യം. ടോസ് നഷ്ടപ്പെട്ട് ആദ്യം ബാറ്റ് ചെയ്ത മുംബൈ നിശ്ചിത 20 ഓവറിൽ ഏഴ് വിക്കറ്റ് നഷ്ടത്തിൽ 166 റൺസാണ് നേടിയത്. അർദ്ധസെഞ്ച്വറി നേടിയ തിലക് വർമ്മയാണ് മുംബൈയുടെ ടോപ് സ്കോറർ.
മുംബൈയുടെ തുടക്കം തകർച്ചയോടെയായിരുന്നു. ഓപ്പണർ റയാൻ റിക്കൾട്ടൺ 2 റൺസെടുത്ത് പുറത്തായി. മികച്ച ഫോമിലായിരുന്ന രോഹിത് ശർമ്മ 22 റൺസെടുത്ത് മടങ്ങിയത് ടീമിന് വലിയ തിരിച്ചടിയായി. പിന്നാലെ എത്തിയ ക്യാപ്റ്റൻ സൂര്യകുമാർ യാദവ് നേരിട്ട ആദ്യ പന്തിൽ തന്നെ പുറത്തായതോടെ മുംബൈ 28 റൺസിന് മൂന്ന് വിക്കറ്റ് എന്ന നിലയിലേക്ക് കൂപ്പുകുത്തി.
നാലാം വിക്കറ്റിൽ ഒത്തുചേർന്ന നമൻ ധീറും തിലക് വർമ്മയും ചേർന്ന് മുംബൈയെ മത്സരത്തിലേക്ക് തിരികെ കൊണ്ടുവന്നു. ഇരുവരും ചേർന്ന് 82 റൺസിന്റെ കൂട്ടുകെട്ടാണ് പടുത്തുയർത്തിയത്. നമൻ ധീർ 47 റൺസും തിലക് വർമ്മ 57 റൺസും നേടി പുറത്തായി. ഇവർക്ക് ശേഷം വന്നവർക്ക് റൺനിരക്ക് ഉയർത്താൻ കഴിയാതെ വന്നത് മുംബൈയ്ക്ക് വിനയായി.
ആർസിബിക്കായി വെറ്ററൻ പേസർ ഭുവനേശ്വർ കുമാർ നാല് വിക്കറ്റുകൾ വീഴ്ത്തി മികച്ച പ്രകടനം കാഴ്ചവെച്ചു. ജോഷ് ഹേസിൽവുഡ്, റാസിക് സലാം ദാർ, റൊമാരിയോ ഷെപ്പേർഡ് എന്നിവർ ഓരോ വിക്കറ്റ് വീതം നേടി. ഈ മത്സരത്തിൽ വിജയിച്ചാൽ പോയിന്റ് പട്ടികയിൽ നാലാം സ്ഥാനത്തുള്ള ബംഗളൂരുവിന് രണ്ടാം സ്ഥാനത്തേക്ക് ഉയരാൻ സാധിക്കും.
Photo and News Source: Kerala Kaumudi Latest
