പശ്ചിമ ബംഗാൾ നിയമസഭാ തിരഞ്ഞെടുപ്പിലെ പരാജയം അംഗീകരിക്കാൻ തയ്യാറാകാതെ മുഖ്യമന്ത്രി മമത ബാനർജി. തന്നെയും പാർട്ടിയെയും നിയമവിരുദ്ധമായി പരാജയപ്പെടുത്തിയതാണെന്നും, ഇതിന്റെ സത്യം വൈകാതെ പുറത്തുവരുമെന്നും മമത ആരോപിച്ചു. ഭയമില്ലാത്തവരും ജന്മനാടിനെ സ്നേഹിക്കുന്നവരും ബംഗാളിൽ സ്വാഭാവികമായി ഒന്നിക്കുമെന്നും, ആരുടെയും മുന്നിൽ അഭ്യർത്ഥനയുമായി പോകേണ്ടതില്ലെന്നും അവർ വ്യക്തമാക്കി.
മുൻപെങ്ങുമില്ലാത്ത വിധം തൃണമൂൽ കോൺഗ്രസ് പ്രവർത്തകർ ആക്രമിക്കപ്പെടുകയാണെന്ന് മമത കുറ്റപ്പെടുത്തി. താൻ അധികാരത്തിൽ ഇരുന്നപ്പോൾ ആരെയും ആക്രമിക്കാൻ അനുവദിച്ചിരുന്നില്ലെന്നും, എന്നാൽ ബിജെപി തന്റെ സുരക്ഷ പോലും പിൻവലിച്ചുവെന്നും അവർ ആരോപിച്ചു. തിരഞ്ഞെടുപ്പ് ഫലം പുറത്തുവന്നതിന് പിന്നാലെ മുഖ്യമന്ത്രി സ്ഥാനം രാജിവയ്ക്കാതെ മമത സ്വീകരിച്ച നിലപാട് രാഷ്ട്രീയ കേന്ദ്രങ്ങളിൽ വലിയ ചർച്ചകൾക്ക് വഴിവെച്ചിരുന്നു.
സമൂഹമാധ്യമങ്ങളിലെ തന്റെ പ്രൊഫൈലിൽ 'പശ്ചിമ ബംഗാൾ മുഖ്യമന്ത്രി' എന്ന വിശേഷണം മമത മാറ്റിയിരുന്നില്ല. സത്യപ്രതിജ്ഞാ ചടങ്ങിന് ശേഷം, 15-ാമത്തെയും 16-ാമത്തെയും 17-ാമത്തെയും നിയമസഭാ കാലത്തെ മുഖ്യമന്ത്രിയെന്ന് അവർ അത് തിരുത്തി. അതേസമയം, ശക്തമായ പ്രതിപക്ഷമായി നിലകൊള്ളുമെന്ന് അഭിഷേക് ബാനർജി പ്രഖ്യാപിച്ചു. ജനാധിപത്യ സ്ഥാപനങ്ങൾ പക്ഷപാതപരമായി പെരുമാറിയെന്നും, പ്രവർത്തകർ ഈ പ്രതിസന്ധി ഘട്ടത്തിൽ പാർട്ടിക്കൊപ്പം നിൽക്കണമെന്നും അദ്ദേഹം ആവശ്യപ്പെട്ടു.
തിരഞ്ഞെടുപ്പിൽ അട്ടിമറി നടന്നെന്നാരോപിച്ച് അന്താരാഷ്ട്ര നീതിന്യായ കോടതിയെ സമീപിക്കാൻ മമത ആലോചിക്കുന്നതായി റിപ്പോർട്ടുകൾ ഉണ്ടെങ്കിലും ഇതിന് ഔദ്യോഗിക സ്ഥിരീകരണം ലഭിച്ചിട്ടില്ല. ബംഗാളിലെ വിജയത്തിന്റെ ആവേശത്തിൽ ബിജെപി പ്രവർത്തകർ ആഘോഷങ്ങൾ തുടരുമ്പോൾ, മമതയുടെ ഈ നിലപാടുകൾ വരും ദിവസങ്ങളിൽ സംസ്ഥാനത്ത് കൂടുതൽ രാഷ്ട്രീയ നാടകങ്ങൾക്ക് വഴിവെക്കുമെന്നാണ് സൂചന.
Photo and News Source: Asianet News
