പാചകവാതക വിലവര്ധനയും സിലിണ്ടറുകളുടെ ലഭ്യതക്കുറവും ഹോട്ടല് മേഖലയെ വലിയ പ്രതിസന്ധിയിലാക്കിയതോടെ, അതിജീവനത്തിനായി പുതിയ വഴികള് തേടുകയാണ് ഹോട്ടല് ഉടമകള്. ഗ്യാസ് സിലിണ്ടറുകളുടെ അമിതവില കാരണം പല ചെറുകിട ഹോട്ടലുകളും അടച്ചുപൂട്ടേണ്ടി വന്ന സാഹചര്യത്തിലാണ്, അടുക്കളകളില് വിറകടുപ്പുകള്ക്ക് വീണ്ടും പ്രാധാന്യം ലഭിക്കുന്നത്.
ആധുനിക ഹോട്ടലുകളുടെ അടുക്കളകളില് പരമ്പരാഗത രീതിയിലുള്ള വിറകടുപ്പുകള് നിര്മിക്കുക പ്രയാസകരമാണ്. ഈ പ്രശ്നത്തിന് പരിഹാരമായി ഇരുമ്പില് നിര്മിച്ച അത്യാധുനിക അടുപ്പുകള് വിപണിയില് സജീവമായിരിക്കുകയാണ്. ചായ ഉണ്ടാക്കുന്നതിനും പൊറോട്ട, ദോശ തുടങ്ങിയ വിഭവങ്ങള് തയ്യാറാക്കുന്നതിനും അനുയോജ്യമായ രീതിയിലാണ് ഇവയുടെ രൂപകല്പന. പുക പുറത്തേക്ക് കളയാന് ഫാനുകളും ഇതില് ഘടിപ്പിച്ചിട്ടുണ്ട്.
വലിപ്പത്തിനനുസരിച്ച് 1000 മുതല് 2000 രൂപ വരെയാണ് ഈ അടുപ്പുകളുടെ വില. ഒരു സിലിണ്ടറിന് ഏകദേശം 3500 രൂപയോളം ചെലവ് വരുന്ന സാഹചര്യത്തില്, ഗ്യാസ് സിലിണ്ടറുകളെ മാത്രം ആശ്രയിക്കുന്നത് ഹോട്ടലുടമകള്ക്ക് വലിയ സാമ്പത്തിക ബാധ്യതയാണ് ഉണ്ടാക്കുന്നത്. ആഴ്ചയില് രണ്ട് സിലിണ്ടറുകള് ഉപയോഗിക്കുന്ന ചെറിയ ഹോട്ടലുകള്ക്ക് പോലും 7000 രൂപയോളം ഗ്യാസിനായി ചെലവാക്കേണ്ടി വരുന്നു.
ഈ സാമ്പത്തിക പ്രതിസന്ധി മറികടക്കാന് പുതിയ തരം വിറകടുപ്പുകള് ഹോട്ടലുടമകള്ക്ക് വലിയ ആശ്വാസമാണ് പകരുന്നത്. ഗ്യാസ് ക്ഷാമം കാരണം അടച്ചിട്ടിരുന്ന പല ഹോട്ടലുകളും ഈ പുതിയ സംവിധാനം ഉപയോഗപ്പെടുത്തി വീണ്ടും തുറന്നു പ്രവര്ത്തിക്കാന് തുടങ്ങിയിട്ടുണ്ട്. ചെലവ് കുറയ്ക്കാനും ബിസിനസ് നിലനിര്ത്താനും ഈ പരീക്ഷണം സഹായിക്കുമെന്നാണ് ഉടമകളുടെ പ്രതീക്ഷ.
Photo and News Source: Samakalika Malayalam
