കെ.എസ്.ആർ.ടി.സി ബസുകളിൽ നാളെ മുതൽ ജൻഡർ ടിക്കറ്റിങ് സംവിധാനം നടപ്പിലാക്കാൻ ഔദ്യോഗിക ഉത്തരവ് പുറത്തിറങ്ങി. ഇനി മുതൽ ബസുകളിൽ വിതരണം ചെയ്യുന്ന ടിക്കറ്റുകളിൽ യാത്രക്കാരൻ സ്ത്രീയാണോ പുരുഷനാണോ എന്ന് പ്രത്യേകം രേഖപ്പെടുത്തും. ഇതിനായി ബസുകളിലെ ഇ.ടി.എം (ETM) മെഷീനുകളിൽ ആവശ്യമായ സാങ്കേതിക മാറ്റങ്ങൾ വരുത്തിയിട്ടുണ്ട്.
യു.ഡി.എഫ് സർക്കാർ അധികാരത്തിൽ വന്നാൽ സ്ത്രീകൾക്ക് ബസ് യാത്ര സൗജന്യമാക്കുമെന്ന് നേരത്തെ പ്രഖ്യാപിച്ചിരുന്നു. ഈ പദ്ധതി നടപ്പിലാക്കുന്നതിന്റെ മുന്നോടിയായാണ് ഇപ്പോൾ ജൻഡർ ടിക്കറ്റിങ് സംവിധാനം ഏർപ്പെടുത്തുന്നത്. ബസുകളിൽ യാത്ര ചെയ്യുന്ന സ്ത്രീകളുടെ കൃത്യമായ എണ്ണം കണക്കാക്കുക എന്നതാണ് ഈ പുതിയ പരിഷ്കാരത്തിലൂടെ ലക്ഷ്യമിടുന്നത്.
കെ.എസ്.ആർ.ടി.സി ഡെപ്യൂട്ടി ജനറൽ മാനേജർ നിക്ഷാന്ത് എസ്. പുറത്തിറക്കിയ ഉത്തരവിൽ ഇക്കാര്യം വ്യക്തമാക്കുന്നുണ്ട്. ഉത്തരവ് പ്രകാരം, കണ്ടക്ടർമാർ ഇ.ടി.എം മെഷീൻ ഉപയോഗിച്ച് ടിക്കറ്റ് നൽകുമ്പോൾ യാത്രക്കാരുടെ ലിംഗഭേദം കൃത്യമായി രേഖപ്പെടുത്തേണ്ടതാണ്. ഈ നിർദ്ദേശങ്ങൾ ഒമ്പതാം തീയതി മുതൽ കർശനമായി പാലിക്കണമെന്ന് എല്ലാ ഡിപ്പോകൾക്കും നിർദ്ദേശം നൽകിയിട്ടുണ്ട്.
ഉത്തരവിൽ പറയുന്നത് ഇങ്ങനെ: "കെ.എസ്.ആർ.ടി.സിയിൽ ജൻഡർ ടിക്കറ്റിങ് നടപ്പിലാക്കുന്നതിന്റെ ഭാഗമായി ഇ.ടി.എം ഉപകരണങ്ങൾ വഴി ടിക്കറ്റ് വിതരണം ചെയ്യുമ്പോൾ യാത്രക്കാരെ പുരുഷൻ/സ്ത്രീ എന്ന് രേഖപ്പെടുത്തുന്നതിനുള്ള സൗകര്യം 9 മുതൽ പ്രാബല്യത്തിൽ വരുത്തും. ഇതു പ്രകാരം, കണ്ടക്ടർമാർ ഇ.ടി.എം ഉപകരണങ്ങൾ ഉപയോഗിച്ച് ടിക്കറ്റ് വിതരണം ചെയ്യുമ്പോൾ യാത്രക്കാരുടെ വിവരങ്ങൾ ഉചിതമായി രേഖപ്പെടുത്തേണ്ടതാണ്. ഒമ്പതു മുതൽ നിർദേശങ്ങൾ പാലിക്കുന്നതിന് എല്ലാ ഡിപ്പോകൾക്കും ആവശ്യമായ നിർദേശങ്ങൾ നൽകേണ്ടതാണ്."
Photo and News Source: Sathyam Online
