കർണാടകയിലെ ചാമരാജ്പേട്ടിന് സമീപം അയൽവാസിയായ യുവതിയെ കടന്നുപിടിക്കാൻ ശ്രമിച്ച യുവാവ് അറസ്റ്റിൽ. കാർ ഡ്രൈവറായ പട്ടുരാജുവാണ് സംഭവത്തിൽ പിടിയിലായത്. യുവതി നൽകിയ പരാതിയുടെ അടിസ്ഥാനത്തിലാണ് പോലീസ് നടപടി സ്വീകരിച്ചത്.
സംഭവദിവസം വീടിന്റെ പിൻഭാഗത്ത് പാത്രങ്ങൾ കഴുകിക്കൊണ്ടിരിക്കുകയായിരുന്നു മുപ്പതുകാരിയായ യുവതി. ഈ സമയം അവിടേക്ക് എത്തിയ പട്ടുരാജു യുവതിയെ കടന്നുപിടിക്കുകയായിരുന്നു. യുവതി ബഹളം വെച്ചതിനെത്തുടർന്ന് സെക്യൂരിറ്റി ജീവനക്കാരനായ ഭർത്താവ് സ്ഥലത്തെത്തി പ്രതിയെ തടയാൻ ശ്രമിച്ചു.
ഭർത്താവിനെ കണ്ടതോടെ പ്രകോപിതനായ പട്ടുരാജു, യുവതി പാത്രങ്ങൾ കഴുകാൻ വെച്ചിരുന്ന ഫ്രൈയിംഗ് പാൻ ഉപയോഗിച്ച് ഭർത്താവിന്റെ തലയ്ക്കടിച്ചു. ഇദ്ദേഹം നിലത്തുവീണ തക്കം നോക്കി, കൈവശമുണ്ടായിരുന്ന കത്തി ഉപയോഗിച്ച് പട്ടുരാജു ഭർത്താവിനെ കുത്തി പരിക്കേൽപ്പിക്കുകയായിരുന്നു.
ആക്രമണം ശ്രദ്ധയിൽപ്പെട്ട നാട്ടുകാർ ഉടൻ തന്നെ ഓടിയെത്തി ഭർത്താവിനെ രക്ഷപ്പെടുത്തുകയും പ്രതിയെ തടഞ്ഞുവെക്കുകയും ചെയ്തു. സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചു. പട്ടുരാജുവിനെ അറസ്റ്റ് ചെയ്തതായും കൂടുതൽ ചോദ്യം ചെയ്യലുകൾ നടന്നു വരികയാണെന്നും അധികൃതർ അറിയിച്ചു.
Photo and News Source: Sathyam Online
