പശ്ചിമ ബംഗാളിൽ ബിജെപി നേതാവ് സുവേന്ദു അധികാരിയുടെ പേഴ്സണൽ അസിസ്റ്റന്റ് ചന്ദ്രനാഥ് രഥ് വെടിയേറ്റ് മരിച്ച സംഭവത്തിൽ അന്വേഷണം ഊർജിതമാക്കി പോലീസ്. കൊലപാതകം അന്വേഷിക്കുന്നതിനായി ഐജി റാങ്കിലുള്ള ഉദ്യോഗസ്ഥന്റെ നേതൃത്വത്തിൽ പ്രത്യേക അന്വേഷണ സംഘത്തെ (SIT) രൂപീകരിച്ചതായി അധികൃതർ അറിയിച്ചു. വിവിധ ജില്ലകളിൽ നിന്നും പ്രത്യേക യൂണിറ്റുകളിൽ നിന്നുമുള്ള ഉദ്യോഗസ്ഥർ ഉൾപ്പെടുന്നതാണ് ഈ സംഘം. ആക്രമണത്തിന് പിന്നിലെ ഗൂഢാലോചന പുറത്തുകൊണ്ടുവരാൻ കേസിന്റെ എല്ലാ വശങ്ങളും സംഘം പരിശോധിക്കും.
സംഭവത്തിൽ നിരവധി പ്രതികൾ പോലീസ് കസ്റ്റഡിയിലുണ്ടെന്ന് പോലീസ് വൃത്തങ്ങൾ സ്ഥിരീകരിച്ചു. എന്നാൽ, വെടിയുതിർത്ത പ്രധാന പ്രതികൾ ഇപ്പോഴും ഒളിവിലാണെന്നാണ് വിവരം. ബുധനാഴ്ച രാത്രി 10.30-ഓടെ നോർത്ത് 24 പർഗാനാസിലെ മധ്യഗ്രാം മേഖലയിലായിരുന്നു ദാരുണമായ സംഭവം നടന്നത്. കൊൽക്കത്തയിൽ നിന്ന് വീട്ടിലേക്ക് മടങ്ങുകയായിരുന്ന ചന്ദ്രനാഥ് രഥിന്റെ വാഹനത്തെ അക്രമികൾ തടഞ്ഞുനിർത്തി വെടിയുതിർക്കുകയായിരുന്നു. നെഞ്ചിലും വയറിലും മുഖത്തും വെടിയേറ്റ രഥ് ആശുപത്രിയിൽ വെച്ച് മരണപ്പെട്ടു. ഒപ്പമുണ്ടായിരുന്ന ഡ്രൈവർ ഗുരുതരാവസ്ഥയിൽ ചികിത്സയിലാണ്.
ഈ കൊലപാതകത്തിന് പിന്നിൽ തൃണമൂൽ കോൺഗ്രസ് ആണെന്ന് ബിജെപി ആരോപിച്ചു. ഭവാനിപുരിൽ മമത ബാനർജിയെ പരാജയപ്പെടുത്തിയതിന്റെ പ്രതികാരമായാണ് ചന്ദ്രനാഥ് രഥിനെ വധിച്ചതെന്ന് സുവേന്ദു അധികാരി ആരോപിച്ചു. തൃണമൂൽ ഗുണ്ടകളെ നിയമത്തിന് മുന്നിൽ കൊണ്ടുവരുമെന്ന് അദ്ദേഹം വ്യക്തമാക്കി. സംഭവത്തിൽ പ്രതിഷേധിച്ച് പശ്ചിം മേദിനിപൂർ ഉൾപ്പെടെയുള്ള വിവിധയിടങ്ങളിൽ ബിജെപി പ്രവർത്തകർ റോഡ് ഉപരോധിക്കുകയും പ്രതിഷേധ പ്രകടനങ്ങൾ നടത്തുകയും ചെയ്തു. പ്രദേശത്ത് പോലീസും കേന്ദ്ര സേനയും കനത്ത ജാഗ്രതയിലാണ്.
Photo and News Source: Janmabhumi
