ആമാശയത്തിന്റെ ആവരണത്തിലുണ്ടാകുന്ന വ്രണങ്ങളെയാണ് വൈദ്യശാസ്ത്രപരമായി വയറ്റിലെ പുണ്ണ് അഥവാ അൾസർ എന്ന് വിളിക്കുന്നത്. ദഹനവ്യവസ്ഥയെ ബാധിക്കുന്ന ഈ അവസ്ഥ പലപ്പോഴും അവഗണിക്കപ്പെടാറുണ്ട്. എന്നാൽ, കൃത്യസമയത്ത് രോഗലക്ഷണങ്ങൾ തിരിച്ചറിഞ്ഞ് ചികിത്സ തേടുന്നത് ഗുരുതരമായ ആരോഗ്യപ്രശ്നങ്ങൾ ഒഴിവാക്കാൻ സഹായിക്കും.
നെഞ്ചിന് താഴെയും പൊക്കിളിന് മുകളിലുമായി അനുഭവപ്പെടുന്ന കത്തുന്ന വേദനയാണ് ഇതിന്റെ ഏറ്റവും പ്രധാനപ്പെട്ട ലക്ഷണം. ഈ വേദന ചിലപ്പോൾ മങ്ങിയ രീതിയിലോ അല്ലെങ്കിൽ തീവ്രമായോ അനുഭവപ്പെടാം. ഭക്ഷണം കഴിക്കുന്നതിന് തൊട്ടുമുമ്പോ അല്ലെങ്കിൽ വിശപ്പുള്ള സമയത്തോ ഈ വേദന വർദ്ധിക്കുന്നതായി കാണാറുണ്ട്.
തുടർച്ചയായ ദഹനക്കേട്, വയറു വീർക്കൽ, ഭക്ഷണം കഴിച്ച ഉടനെ വയർ നിറഞ്ഞതായി തോന്നുക എന്നിവയും പ്രധാന ലക്ഷണങ്ങളാണ്. കൂടാതെ, ഇടയ്ക്കിടെയുണ്ടാകുന്ന ഓക്കാനം, ഛർദ്ദി, നെഞ്ചെരിച്ചിൽ എന്നിവയും ശ്രദ്ധിക്കേണ്ടതുണ്ട്. അസിഡിറ്റിയുടെ പ്രശ്നം വർദ്ധിക്കുന്നതും ഇതിന്റെ സൂചനയാകാം.
വിശപ്പില്ലായ്മയും അകാരണമായി ശരീരഭാരം കുറയുന്നതും ഗൗരവമായി കാണേണ്ട ലക്ഷണങ്ങളാണ്. ഇത്തരം ശാരീരിക മാറ്റങ്ങൾ കണ്ടാൽ സ്വയം ചികിത്സയ്ക്ക് മുതിരാതെ ഒരു ഡോക്ടറുടെ സേവനം തേടേണ്ടത് അത്യാവശ്യമാണ്. കൃത്യമായ ഭക്ഷണക്രമവും ജീവിതശൈലിയിലെ മാറ്റങ്ങളും രോഗശമനത്തിന് അത്യന്താപേക്ഷിതമാണ്.
Photo and News Source: Sathyam Online
