രാജസ്ഥാൻ റോയൽസിന്റെ 15 വയസ്സുകാരൻ താരം വൈഭവ് സൂര്യവംശിയുടെ തകർപ്പൻ ബാറ്റിംഗ് പ്രകടനങ്ങൾ ക്രിക്കറ്റ് ലോകത്തെ അമ്പരപ്പിക്കുകയാണ്. ഐപിഎല്ലിൽ വെടിക്കെട്ട് ബാറ്റിംഗ് കാഴ്ചവെക്കുന്ന ഈ കൗമാരക്കാരനെക്കുറിച്ച് മുൻ ഇംഗ്ലീഷ് താരങ്ങൾ നടത്തിയ പ്രവചനങ്ങളാണ് ഇപ്പോൾ ആരാധകർക്കിടയിൽ വലിയ ചർച്ചയായിരിക്കുന്നത്. 'സ്റ്റിക് ടു ക്രിക്കറ്റ്' എന്ന പോഡ്കാസ്റ്റിൽ മൈക്കൽ വോൺ, അലസ്റ്റർ കുക്ക്, ഫിൽ ടഫ്നൽ, ഡേവിഡ് ലോയ്ഡ് എന്നിവർ വൈഭവിന്റെ കരിയറിനെക്കുറിച്ച് രസകരമായ നിരീക്ഷണങ്ങൾ പങ്കുവെച്ചു.
ക്രിസ് ഗെയ്ലിന്റെ റെക്കോർഡിനോട് അടുക്കുന്ന വേഗതയിൽ റൺസ് കണ്ടെത്തുന്ന വൈഭവ്, നിലവിൽ ലോകത്തിലെ ഏറ്റവും മികച്ച സിക്സർ ഹിറ്ററാണെന്ന് അലസ്റ്റർ കുക്ക് അഭിപ്രായപ്പെട്ടു. അഭിഷേക് ശർമയുടെ റെക്കോർഡിന് തൊട്ടരികിലാണ് വൈഭവ് നിൽക്കുന്നതെന്ന് മൈക്കൽ വോൺ ചൂണ്ടിക്കാട്ടി. എന്നാൽ, ഇതേ വേഗതയിൽ മുന്നേറിയാൽ 21 വയസ്സാവുമ്പോഴേക്കും താരം ക്രിക്കറ്റ് കളിച്ച് മടുത്ത് 'ബേൺ ഔട്ട്' ആകാൻ സാധ്യതയുണ്ടെന്ന് ഫിൽ ടഫ്നൽ പ്രവചിച്ചു.
ടഫ്നലിന്റെ ഈ അഭിപ്രായത്തെ പിന്തുണച്ചുകൊണ്ട് മൈക്കൽ വോൺ പറഞ്ഞത്, അപ്പോഴേക്കും വൈഭവിന്റെ കയ്യിൽ ആവശ്യത്തിന് പണം സമ്പാദിക്കാൻ സാധിക്കുമെന്നും, അതിനാൽ സമാധാനമായി വിരമിക്കാൻ അവൻ തീരുമാനിച്ചേക്കാമെന്നുമാണ്. വൈഭവിന്റെ അസാമാന്യമായ കഴിവിനെ വാനോളം പുകഴ്ത്തിയ വോൺ, ഇന്ത്യയുടെ വരാനിരിക്കുന്ന അയർലൻഡ്, ഇംഗ്ലണ്ട് പര്യടനങ്ങൾക്കുള്ള ടീമിൽ ഈ കൗമാര താരത്തെ ഉൾപ്പെടുത്തണമെന്നും ആവശ്യപ്പെട്ടു.
സൺറൈസേഴ്സ് ഹൈദരാബാദിനെതിരെ 36 പന്തിൽ സെഞ്ച്വറി നേടി ഇതിനകം തന്നെ വൈഭവ് വാർത്തകളിൽ ഇടംപിടിച്ചിരുന്നു. രാജസ്ഥാൻ റോയൽസിനായി ഈ സീസണിൽ മികച്ച ഫോമിൽ തുടരുന്ന താരം, ഭാവിയിൽ ഇന്ത്യൻ ക്രിക്കറ്റിന്റെ വലിയ പ്രതീക്ഷയായി മാറുമെന്നാണ് ആരാധകരുടെ വിശ്വാസം. എങ്കിലും, ഇംഗ്ലീഷ് ഇതിഹാസങ്ങളുടെ ഈ പ്രവചനം ക്രിക്കറ്റ് ലോകത്ത് വലിയ ചർച്ചകൾക്ക് വഴിവെച്ചിരിക്കുകയാണ്.
Photo and News Source: Asianet News
