തിരുവനന്തപുരം: പാമ്പ് കടിയേറ്റുള്ള മരണങ്ങള് കുറയ്ക്കാനായി ആരോഗ്യവകുപ്പ് പ്രത്യേക കര്മ്മപദ്ധതി അവതരിപ്പിച്ചു. പാമ്പുകടി കേസുകള് കാര്യക്ഷമമായി നിരീക്ഷിക്കാനും ഡേറ്റാ അടിസ്ഥാനത്തില് ആശുപത്രികളുടെ ഹോട്ട്സ്പോട്ട് മാപ്പിംഗ് നടത്താനുമാണ് പദ്ധതി.
പാമ്പുകടി കൂടുതല് സംഭവിക്കുന്ന ആശുപത്രികളെ ‘റെഡ് ഫ്ളാഗ്’ ഇന്സ്റ്റിറ്റ്യൂഷനായി പ്രഖ്യാപിച്ച് കൂടുതൽ ചികിത്സാസൗകര്യങ്ങള് ഒരുക്കും. സാമൂഹികാധിഷ്ഠിത നിരീക്ഷണത്തിലൂടെ പാമ്പുകടികള് റിപ്പോര്ട്ട് ചെയ്യാനുള്ള നടപടികളും ശക്തിപ്പെടുത്തും. ചികിത്സാ സമയത്തെ കാലതാമസം നിരീക്ഷിക്കാനും മന്ത്രി വീണാ ജോര്ജ് വ്യക്തമാക്കി.
PHC/CHC പോലുള്ള വിദൂര ആശുപത്രികളില് ആന്റി-സ്നേക്ക് വെനം ലഭ്യമാക്കാനും പദ്ധതി ഉൾക്കൊള്ളുന്നു. ആശുപത്രികളെ ‘ഹബ് ആന്റ് സ്പോക്ക്’ രീതിയില് ക്രമീകരിച്ച് റഫറല് സംവിധാനം കാര്യക്ഷമമാക്കും. ഹമ്പ് നോസ് പിറ്റ് വൈപ്പര്, മലബാര് പിറ്റ് വൈപ്പര് തുടങ്ങിയവയ്ക്കായി പ്രത്യേക ചികിത്സാ പ്രോട്ടോക്കോളുകളും നടപ്പിലാക്കും.
ഡോക്ടര്മാര്ക്ക് പാമ്പുകളുടെ ചിത്രങ്ങള് പരിചയപ്പെടുത്തുകയും നഴ്സുമാര്ക്ക് LMA പരിശീലനം നല്കുകയും ചെയ്യും. പാമ്പുകടിയെക്കുറിച്ചുള്ള ഗവേഷണങ്ങളെയും പ്രോത്സാഹിപ്പിക്കും. തൊഴിലാളികള്ക്കും കർഷകർക്കും കൂടുതൽ സംരക്ഷണം ഉറപ്പാക്കാനാണ് ഈ പദ്ധതി.
Photo and News Source: Janam TV
