ഫ്രഞ്ച് ബ്രാൻഡ് റെനോയുടെ ജനപ്രിയ 7-സീറ്റർ എംപിവിയായ ട്രൈബർ പുതിയ ഫീച്ചറുകളോടെ ഇന്ത്യൻ വിപണിയിൽ എത്തി. 2026 മോഡലിന്റെ അപ്ഡേറ്റുകളോടെയാണ് പുറത്തിറങ്ങിയിരിക്കുന്നത്. യാത്രക്കാർക്ക് കൂടുതൽ സൗകര്യവും പ്രായോഗികതയും ഉറപ്പാക്കുന്ന പുതിയ സംവിധാനങ്ങൾ എല്ലാ വേരിയന്റുകളിലും ഉൾപ്പെടുത്തിയിട്ടുണ്ട്. ഈ മാറ്റങ്ങളോടൊപ്പം എല്ലാ വേരിയന്റുകളുടെയും വിലയിൽ ചെറിയ വര്ദ്ധനവുമുണ്ടായി. നിലവിൽ 4,575 രൂപ മുതൽ 9,150 രൂപ വരെയാണ് വില വർദ്ധിപ്പിച്ചിരിക്കുന്നത്.
പുതിയ ട്രൈബറിന്റെ പ്രധാന ആകർഷണം സെഗ്മെന്റ് ഫസ്റ്റ് ഓട്ടോമാറ്റിക് ക്ലൈമറ്റ് കൺട്രോൾ സംവിധാനമാണ്. ടോപ്പ്-എൻഡ് ഇമോഷൻ ട്രിമ്മിലാണ് ഇത് ലഭ്യമാക്കിയിരിക്കുന്നത്. രണ്ടാം നിരയിലെ വൺ-ടച്ച് ഫോൾഡ് ആൻഡ് ടംബിൾ സീറ്റുകൾ യാത്രക്കാർക്ക് മൂന്നാം നിര സീറ്റുകളിലേക്ക് എളുപ്പത്തിൽ പ്രവേശിക്കാൻ സഹായിക്കുന്നു. പൂർണ്ണമായി മടക്കാവുന്ന രണ്ടാം നിര സീറ്റുകൾ 1,065 ലിറ്റർ വരെ ബൂട്ട് സ്പേസ് നൽകുന്നു. യാത്രകളെ കൂടുതൽ സുഖകരമാക്കാൻ ഈ മാറ്റങ്ങൾ സഹായിക്കുന്നു.
ഇവല്യൂഷൻ വേരിയന്റിൽ സ്റ്റിയറിംഗ് മൗണ്ടഡ് ഓഡിയോ, ഫോൺ കൺട്രോളുകൾ, ഡേ-നൈറ്റ് അഡ്ജസ്റ്റബിൾ റിയർ വ്യൂ മിറർ, റിയർ റൂം ലാംപ് എന്നിവ ഉൾപ്പെടുത്തിയിരിക്കുന്നു. ടെക്നോ ട്രിമിലും മാറ്റങ്ങൾ വരുത്തിയിട്ടുണ്ട്. വില ₹6 ലക്ഷത്തില് താഴെയാണ് തുടരുന്നത്.
Photo and News Source: DriveSpark
