കൊച്ചിയിൽ ചൂട് കൂടുന്നതോടെ പാമ്പ് കടിയേൽക്കുന്ന സംഭവങ്ങളും വർധിച്ചു വരികയാണ്. എറണാകുളം ജില്ലയിലെ തിരുമാറാടിയിൽ പ്ലാവിൽ നിന്നും നാല് ചക്കകൾ ഒന്നിച്ച് വീഴുകയുണ്ടായി. വീട്ടുകാർ ചക്കയെടുക്കാൻ ചെന്നപ്പോൾ അതിനടിയിൽ മൂർഖൻ പാമ്പിനെ കണ്ടു. ചക്കയുടെ ഭാരം താങ്ങാനാവാതെ പാമ്പ് ചത്തുവീഴുകയായിരുന്നു.
കാസർകോട് എളേരിത്തട്ടിൽ കളിക്കുന്ന നാലര വയസ്സുകാരിക്ക് പാമ്പ് കടിയേറ്റു. ഉടൻ തന്നെ കുട്ടിയെ പരിയാരം മെഡിക്കൽ കോളേജിൽ പ്രവേശിപ്പിച്ചു. കോഴിക്കോട് പൂനൂരിൽ 22 വയസ്സുകാരനായ മുഹമ്മദ് അൻസാറിനും പുലർച്ചെ കിടക്കയിൽ പാമ്പിനെ കണ്ടതിനെ തുടർന്ന് കടിയേറ്റു. തിരുവനന്തപുരം കിളിമാനൂരിൽ വീട്ടുമുറ്റത്തിറങ്ങിയപ്പോൾ സരിതയ്ക്കും കടിയേറ്റു.
വേനൽ കടുത്തതോടെ മാളങ്ങളിൽ നിന്നും പാമ്പുകൾ പുറത്തിറങ്ങുന്നത് വർധിച്ചു. വീടും പരിസരവും വൃത്തിയായി സൂക്ഷിക്കുവാൻ ആരോഗ്യ വകുപ്പും വനം വകുപ്പും മുന്നറിയിപ്പ് നൽകുന്നു. രാത്രികാലങ്ങളിൽ ജാഗ്രത പാലിക്കേണ്ടതുണ്ട്.
Photo and News Source: Janam TV
