ഭാര്യ ആർതിയുമായുള്ള വിവാഹമോചന നടപടികൾ പൂർത്തിയാകുന്നത് വരെ അഭിനയരംഗത്ത് നിന്ന് വിട്ടുനിൽക്കുമെന്ന് നടൻ രവി മോഹൻ. തന്റെ ദാമ്പത്യ ജീവിതത്തിലെ പ്രതിസന്ധികളെക്കുറിച്ചും ഗായിക കെനീഷ ഫ്രാൻസിസുമായുള്ള ബന്ധത്തെക്കുറിച്ചും അദ്ദേഹം മാധ്യമങ്ങൾക്ക് മുന്നിൽ തുറന്നുപറഞ്ഞു. വർഷങ്ങളായി ഭാര്യയിൽ നിന്നും കുടുംബത്തിൽ നിന്നും കടുത്ത അവഗണനയും അപമാനവുമാണ് താൻ നേരിടുന്നതെന്ന് നിറകണ്ണുകളോടെ അദ്ദേഹം വ്യക്തമാക്കി.
“എന്റെ വിവാഹമോചനം നടക്കുന്നതുവരെ ഞാൻ അഭിനയിക്കില്ല. വിവാഹമോചനം ലഭിക്കുകയും സൈബർ ഭീഷണി അവസാനിക്കുകയും ചെയ്യുമ്പോൾ മാത്രമേ എന്റെ ജീവിതം സാധാരണ നിലയിലാകൂ. ഞാൻ വളരെക്കാലം മൗനം പാലിച്ചു, എന്നാൽ ഇപ്പോൾ എന്റെ ക്ഷമ പരീക്ഷിക്കപ്പെടുകയാണ്. വർഷങ്ങളായി ഭാര്യയും കുടുംബവും എന്നെ ഒരു അടിമയെപ്പോലെയാണ് കാണുന്നത്. ഇതിനെല്ലാം എന്റെ പക്കൽ തെളിവുകളുണ്ട്,” രവി മോഹൻ പറഞ്ഞു.
തന്റെ വ്യക്തിജീവിതത്തിൽ ചിലർ അനാവശ്യമായി ഇടപെടുന്നുണ്ടെന്നും, ഒരു പ്രമുഖ നടി ഇതിന് പിന്നിലുണ്ടെന്നും അദ്ദേഹം ആരോപിച്ചു. തന്റെ മക്കളായ ആരവിനെയും അയാനെയും കാണുന്നതിൽ നിന്ന് തന്നെ തടയുകയാണെന്നും, കുട്ടികളുമായുള്ള ഫോൺ ബന്ധം പോലും വിച്ഛേദിച്ചുവെന്നും അദ്ദേഹം കൂട്ടിച്ചേർത്തു. ഈ മാനസിക പീഡനം കാരണം താൻ കടുത്ത വിഷമത്തിലാണെന്നും, ഒരു ദിവസം താൻ ഈ ലോകം വിടുമെന്നും അദ്ദേഹം വികാരാധീനനായി പറഞ്ഞു.
കെനീഷ ഫ്രാൻസിസുമായുള്ള ബന്ധത്തെക്കുറിച്ച് സംസാരിക്കവെ, അവൾക്ക് നല്ലൊരു ജീവിതം ഉണ്ടാകട്ടെ എന്ന് താൻ ആശംസിക്കുന്നതായി അദ്ദേഹം പറഞ്ഞു. താൻ നേരിടുന്ന പ്രതിസന്ധികൾക്ക് പിന്നിൽ പ്രവർത്തിച്ചവരുടെ സമാധാനം താൻ അവസാനിപ്പിക്കുമെന്നും, നീതി ലഭിക്കുമെന്ന പ്രതീക്ഷയിൽ താൻ പോരാട്ടം തുടരുമെന്നും രവി മോഹൻ വ്യക്തമാക്കി.
Photo and News Source: Janmabhumi
