ഉന്നത വിദ്യാഭ്യാസത്തിനും മികച്ച ജീവിതസാഹചര്യങ്ങൾക്കുമായി വിദേശത്തേക്ക് ചേക്കേറിയ ആയിരക്കണക്കിന് മലയാളി വിദ്യാർത്ഥികൾ കടുത്ത പ്രതിസന്ധിയിലേക്ക്. കത്തോലിക്ക കോൺഗ്രസ് ഗ്ലോബൽ യൂത്ത് കൗൺസിൽ പുറത്തുവിട്ട റിപ്പോർട്ട് പ്രകാരം, ഏകദേശം 30,000-ത്തോളം വിദ്യാർത്ഥികൾ വരും വർഷങ്ങളിൽ നാട്ടിലേക്ക് മടങ്ങേണ്ടി വരുമെന്നാണ് കണക്കാക്കുന്നത്. ഇത് കേരളത്തിന്റെ സാമൂഹിക-സാമ്പത്തിക മേഖലയിൽ വലിയ പ്രത്യാഘാതങ്ങൾ സൃഷ്ടിക്കുമെന്ന് വിലയിരുത്തപ്പെടുന്നു.
യു.കെ, കാനഡ, ഓസ്ട്രേലിയ തുടങ്ങിയ രാജ്യങ്ങൾ കുടിയേറ്റ നിയമങ്ങൾ കർശനമാക്കിയതും ആഗോള സാമ്പത്തിക മാന്ദ്യം മൂലം തൊഴിലവസരങ്ങൾ കുറഞ്ഞതുമാണ് ഈ പ്രതിസന്ധിക്ക് പ്രധാന കാരണം. പഠനശേഷം ലഭിക്കേണ്ട 'സ്റ്റേ ബാക്ക്' കാലാവധിയിൽ സ്ഥിരമായ ജോലി കണ്ടെത്താനോ സ്പോൺസർഷിപ്പ് വീസ നേടാനോ കഴിയാത്തത് വിദ്യാർത്ഥികളെ വലയ്ക്കുന്നു. 2023-ലെ കേരള മൈഗ്രേഷൻ സർവേ പ്രകാരം 2.5 ലക്ഷം വിദ്യാർത്ഥികളാണ് വിദേശത്തുള്ളത്. 2027-ഓടെ ഇവരിൽ വലിയൊരു വിഭാഗം തിരിച്ചെത്തുമെന്നാണ് സൂചന.
ഭൂരിഭാഗം വിദ്യാർത്ഥികളും 15 മുതൽ 45 ലക്ഷം രൂപ വരെ വായ്പയെടുത്താണ് വിദേശത്തേക്ക് പോയത്. ഈ തുക ട്യൂഷൻ ഫീസിനായി പോലും തികയാത്ത അവസ്ഥയാണെന്ന് റിപ്പോർട്ട് തയ്യാറാക്കിയ ലിയോൺ ജോസ് വിതയത്തിൽ ചൂണ്ടിക്കാട്ടുന്നു. സാമ്പത്തിക ബാധ്യതയും തൊഴിലില്ലായ്മയും കാരണം വിദ്യാർത്ഥികൾ കടുത്ത മാനസിക സമ്മർദ്ദത്തിലും വിഷാദത്തിലുമാണ്. ചിലർ നിയമവിരുദ്ധമായ മാർഗ്ഗങ്ങളിലേക്ക് തിരിയുന്നത് സ്ഥിതി കൂടുതൽ സങ്കീർണ്ണമാക്കുന്നു.
തിരിച്ചെത്തുന്ന വിദ്യാർത്ഥികൾക്ക് ആശ്വാസമേകാൻ സർക്കാർ അടിയന്തരമായി ഇടപെടണമെന്ന ആവശ്യം ശക്തമാണ്. വിദ്യാഭ്യാസ വായ്പകൾക്ക് മൊറട്ടോറിയവും പലിശ സബ്സിഡിയും അനുവദിക്കുക, മടങ്ങിവരുന്നവരുടെ കഴിവുകൾക്കനുസരിച്ച് കേരളത്തിലെ ഐടി പാർക്കുകളിലും സ്റ്റാർട്ടപ്പുകളിലും തൊഴിലവസരങ്ങൾ സൃഷ്ടിക്കുക, കേന്ദ്ര സർക്കാരിന്റെ സഹായത്തോടെ നയതന്ത്ര തലത്തിൽ ചർച്ചകൾ നടത്തുക തുടങ്ങിയ നിർദ്ദേശങ്ങൾ ഉയർന്നു വരുന്നുണ്ട്.
Photo and News Source: Dhanam
