ദിവസവും കുളിക്കുന്നത് ശരീരശുചിത്വത്തിന് അത്യന്താപേക്ഷിതമാണ്. എന്നാൽ, ഷവറിൽ കുളിക്കുന്നതാണോ അതോ ബാത്ത് ടബ്ബിൽ കിടന്നു കുളിക്കുന്നതാണോ കൂടുതൽ ആരോഗ്യകരം എന്ന കാര്യത്തിൽ പലർക്കും സംശയമുണ്ട്. ബാത്ത് ടബ്ബിലെ കുളി കേൾക്കാൻ സുഖകരമാണെങ്കിലും, വൃത്തിയുടെ കാര്യത്തിൽ ഇത് അത്ര മികച്ചതല്ലെന്നാണ് ആരോഗ്യ വിദഗ്ധരുടെ നിരീക്ഷണം. ബാത്ത് ടബ്ബിൽ കുളിക്കുമ്പോൾ വെള്ളം മാറാത്തതിനാൽ, ശരീരത്തിലെ അഴുക്കും ബാക്ടീരിയകളും വെള്ളത്തിൽ തന്നെ നിലനിൽക്കുകയും അവ ശരീരത്തിന്റെ മറ്റ് ഭാഗങ്ങളിലേക്ക് വ്യാപിക്കുകയും ചെയ്യുന്നു. ഇതിനെ പലപ്പോഴും 'ഫൂട്ട് സൂപ്പ്' അഥവാ കാല് കഴുകിയ വെള്ളം എന്നാണ് പരിഹാസരൂപേണ വിളിക്കാറുള്ളത്.
മറുവശത്ത്, ഷവറിൽ കുളിക്കുമ്പോൾ നിരന്തരം ഒഴുകിക്കൊണ്ടിരിക്കുന്ന വെള്ളം അഴുക്കിനെയും ബാക്ടീരിയകളെയും അപ്പോൾത്തന്നെ ശരീരത്തിൽ നിന്ന് നീക്കം ചെയ്യുന്നു. ചർമ്മത്തിലെ വിയർപ്പ്, എണ്ണമയം, ദുർഗന്ധമുണ്ടാക്കുന്ന ബാക്ടീരിയകൾ എന്നിവയെ ഫലപ്രദമായി നീക്കം ചെയ്യാൻ ഷവർ കുളിയാണ് ഏറ്റവും ഉചിതം. ഇത് ചർമ്മത്തിലെ അണുബാധകളും തിണർപ്പുകളും ഒഴിവാക്കാൻ സഹായിക്കുന്നു. ബ്രിട്ടനിൽ നടന്ന സർവേ പ്രകാരം 59 ശതമാനം ആളുകളും ഷവറിൽ കുളിക്കാനാണ് താൽപ്പര്യപ്പെടുന്നത്.
എങ്കിലും, ബാത്ത് ടബ്ബിലെ കുളിക്ക് ചില ഗുണങ്ങളുമുണ്ട്. ചൂടുവെള്ളവും സോപ്പും ഉപയോഗിക്കുന്നത് പേശിവേദന കുറയ്ക്കാനും രക്തയോട്ടം വർദ്ധിപ്പിക്കാനും മനസിന് ഉന്മേഷം നൽകാനും സഹായിക്കും. നിങ്ങൾ ടബ്ബിൽ കുളിക്കാൻ ഇഷ്ടപ്പെടുന്നവരാണെങ്കിൽ, കുളിക്ക് ശേഷം ഒരു തവണ കൂടി ഷവറിൽ ശരീരം കഴുകുന്നത് വൃത്തി ഉറപ്പാക്കാൻ സഹായിക്കും. കൂടാതെ, ബാത്ത് ടബ്ബിന് പുറത്ത് ഉപയോഗിക്കുന്ന 'ബാത്ത് മാറ്റുകൾ' അണുക്കളുടെ താവളമാണെന്നും വിദഗ്ധർ മുന്നറിയിപ്പ് നൽകുന്നു. നനവ് തങ്ങിനിൽക്കുന്ന ഇത്തരം മാറ്റുകളിൽ പൂപ്പലും ബാക്ടീരിയകളും വേഗത്തിൽ വളരും. അതിനാൽ, ആഴ്ചയിലൊരിക്കലെങ്കിലും ബാത്ത് മാറ്റുകൾ ചൂടുവെള്ളത്തിൽ കഴുകി വെയിലത്ത് ഉണക്കി സൂക്ഷിക്കാൻ ശ്രദ്ധിക്കണം.
Photo and News Source: Kerala Kaumudi
