തമിഴ്നാട് രാഷ്ട്രീയത്തിൽ നിർണായകമായ മാറ്റങ്ങൾക്ക് തുടക്കം കുറിച്ചുകൊണ്ട് എ.ഐ.എ.ഡി.എം.കെയിൽ പിളർപ്പ്. സി.വി. ഷണ്മുഖം നയിക്കുന്ന വിഭാഗം ടി.വി.കെ.യ്ക്ക് പിന്തുണ പ്രഖ്യാപിച്ചതോടെയാണ് സംസ്ഥാന രാഷ്ട്രീയത്തിൽ പുതിയ സമവാക്യങ്ങൾ രൂപപ്പെട്ടത്. തുടർച്ചയായ തിരഞ്ഞെടുപ്പ് പരാജയങ്ങളിൽ മനംമടുത്താണ് പാർട്ടിയെ പുനരുജ്ജീവിപ്പിക്കുക എന്ന ലക്ഷ്യത്തോടെ ഇത്തരമൊരു തീരുമാനത്തിലേക്ക് എത്തിയതെന്ന് ഷണ്മുഖം വ്യക്തമാക്കി. ചൊവ്വാഴ്ച മുഖ്യമന്ത്രി ജോസഫ് വിജയ്യെ നേരിൽ കാണുമെന്നും അദ്ദേഹം അറിയിച്ചു.
പാർട്ടിയുടെ ഭാവിയെക്കുറിച്ച് ഗൗരവമായ ചർച്ചകൾ ആവശ്യമാണെന്ന് ഷണ്മുഖം ചൂണ്ടിക്കാട്ടി. ടി.വി.കെ. സർക്കാർ രൂപീകരിക്കുന്നത് തടയാൻ മുൻ മുഖ്യമന്ത്രി എടപ്പാടി കെ. പളനിസാമി ഡി.എം.കെ.യുമായി സഖ്യത്തിന് ശ്രമിച്ചതിനെ അദ്ദേഹം രൂക്ഷമായി വിമർശിച്ചു. കഴിഞ്ഞ 53 വർഷമായി ഡി.എം.കെ.യ്ക്കെതിരായ നിലപാടാണ് എ.ഐ.എ.ഡി.എം.കെ. സ്വീകരിച്ചിട്ടുള്ളതെന്നും, അങ്ങനെയുള്ള പാർട്ടി ഡി.എം.കെ.യുമായി കൈകോർക്കുന്നത് അംഗീകരിക്കാനാവില്ലെന്നും അദ്ദേഹം പറഞ്ഞു.
അതേസമയം, പാർട്ടിയെ പിളർത്തുകയല്ല, മറിച്ച് പുനരുജ്ജീവിപ്പിക്കുകയും ശക്തിപ്പെടുത്തുകയുമാണ് തന്റെ ലക്ഷ്യമെന്ന് ഷണ്മുഖം വ്യക്തമാക്കി. നിലവിൽ തങ്ങൾക്ക് മറ്റ് സഖ്യങ്ങളൊന്നുമില്ലെന്നും അദ്ദേഹം കൂട്ടിച്ചേർത്തു. 234 സീറ്റുകളിൽ 108 സീറ്റുകൾ നേടിയാണ് ടി.വി.കെ. വിജയിച്ചത്. കേവല ഭൂരിപക്ഷത്തിന് ആവശ്യമായ സീറ്റുകൾ ഉറപ്പാക്കാൻ കോൺഗ്രസ്, ഇടതുപാർട്ടികൾ, വിടുതലൈ ചിരുതൈകൾ കക്ഷി എന്നിവരുടെ പിന്തുണ ടി.വി.കെ.യ്ക്ക് ലഭിച്ചിരുന്നു. ഷണ്മുഖം പക്ഷത്തിന്റെ പിന്തുണ കൂടി എത്തുന്നതോടെ ടി.വി.കെ.യുടെ ഭരണപരമായ അടിത്തറ കൂടുതൽ ശക്തമാകും.
Photo and News Source: Mathrubhumi
