താരസംഘടനയായ 'അമ്മ'യുടെ എക്സിക്യൂട്ടീവ് യോഗം ഇന്ന് കൊച്ചിയിൽ ചേരുന്നു. സംഘടനയിലെ ഫ്രണ്ട് ഓഫീസ് ജീവനക്കാരിയെ അകാരണമായി പിരിച്ചുവിട്ടതുമായി ബന്ധപ്പെട്ട വിവാദങ്ങൾക്കിടെയാണ് നിർണ്ണായകമായ ഈ യോഗം നടക്കുന്നത്. സംഘടനയുടെ ഓഫീസിൽ വെച്ച് നടക്കുന്ന യോഗത്തിൽ ജീവനക്കാരി നൽകിയ പരാതി പ്രധാന ചർച്ചാവിഷയമാകും.
തന്റെ ജോലി നഷ്ടപ്പെട്ടതിന് പിന്നിൽ സംഘടനയുടെ ജനറൽ സെക്രട്ടറി കുക്കു പരമേശ്വരനും ട്രഷറർ ഉണ്ണി ശിവപാലും മാത്രമാണെന്നും, പ്രസിഡന്റ് ശ്വേത മേനോന് ഇതിനെക്കുറിച്ച് അറിവില്ലെന്നും യുവതി ആരോപിക്കുന്നു. തൊഴിൽ വകുപ്പിനും പൊലീസിനും യുവതി പരാതി നൽകിയിട്ടുണ്ട്. ഇതിനു പിന്നാലെ, ഓഫീസിലെ സെക്യൂരിറ്റി ജീവനക്കാരനും നേതൃത്വത്തിനെതിരെ പരാതിയുമായി രംഗത്തെത്തിയത് സംഘടനയ്ക്ക് വലിയ തിരിച്ചടിയായി.
എറണാകുളം നോർത്ത് പൊലീസ് യുവതിയുടെ പരാതിയിൽ പ്രാഥമിക അന്വേഷണം നടത്തിവരികയാണ്. എന്നാൽ, ഇതുവരെ ഔദ്യോഗികമായി കേസ് രജിസ്റ്റർ ചെയ്യാൻ പൊലീസ് തയ്യാറായിട്ടില്ല. സംഘടനയ്ക്കുള്ളിലെ ആഭ്യന്തര പ്രശ്നങ്ങളും പിരിച്ചുവിടലുമായി ബന്ധപ്പെട്ട വിവാദങ്ങളും ഇന്ന് ചേരുന്ന എക്സിക്യൂട്ടീവ് യോഗത്തിൽ വലിയ ചർച്ചകൾക്ക് വഴിവെക്കുമെന്നാണ് സൂചന.
Photo and News Source: Asianet News
