അസമിൽ തുടർച്ചയായി മൂന്നാം തവണയും ബി.ജെ.പി അധികാരത്തിലെത്തുമ്പോൾ, മുഖ്യമന്ത്രിയായി സത്യപ്രതിജ്ഞ ചെയ്യുന്ന ഹിമന്ത ബിശ്വ ശർമയ്ക്ക് കാസർകോടുമായി പതിറ്റാണ്ടുകൾ നീണ്ട ആത്മീയ ബന്ധമാണുള്ളത്. ബേക്കൽ ഗോകുലം ഗോശാലയുടെ അധിപനും പ്രശസ്ത ജ്യോതിഷ പണ്ഡിതനുമായ വിഷ്ണുപ്രസാദ് ഹെബ്ബാറാണ് അദ്ദേഹത്തിന്റെ ആത്മീയ ഗുരു. കഴിഞ്ഞ 16 വർഷമായി ഈ ബന്ധം വളരെ ദൃഢമായി തുടരുന്നു.
2010-ൽ തന്റെ ജീവിതത്തിലെ ഏറ്റവും സങ്കീർണ്ണമായ കാലഘട്ടത്തിലൂടെ കടന്നുപോകുമ്പോഴാണ് ഹിമന്ത ബിശ്വ ശർമ ആദ്യമായി വിഷ്ണു ഹെബ്ബാറിനെ കാണുന്നത്. അന്നുമുതൽ ഇരു കുടുംബങ്ങളും തമ്മിൽ വളരെ അടുത്ത ബന്ധമാണ് പുലർത്തുന്നത്. അസമിലെ നിരവധി ക്ഷേത്രങ്ങളുടെ പുനരുദ്ധാരണ പ്രവർത്തനങ്ങളും പുനഃപ്രതിഷ്ഠകളും അതിരുദ്ര യാഗങ്ങളും വിഷ്ണു ഹെബ്ബാറിന്റെ കാർമികത്വത്തിലാണ് നടന്നുവരുന്നത്.
കേരളത്തിലെ ഒട്ടനവധി നൃത്ത-സംഗീത വാദ്യകലാകാരന്മാരെ അസമിലെ സാംസ്കാരിക വേദികളുമായി ബന്ധിപ്പിക്കുന്നതിൽ വിഷ്ണു ഹെബ്ബാർ വലിയ പങ്കുവഹിക്കുന്നുണ്ട്. നിലവിൽ ഗോശാലയിൽ വൈശാഖനടനം ദേശീയ നൃത്തോത്സവം നടക്കുകയാണ്. അതിനാൽ സത്യപ്രതിജ്ഞാ ചടങ്ങിൽ നേരിട്ട് പങ്കെടുക്കാൻ സാധിക്കില്ലെങ്കിലും, ഈ മാസം 15-ന് അദ്ദേഹം ഗുവാഹത്തിയിലേക്ക് യാത്ര തിരിക്കും.
Photo and News Source: Mathrubhumi
