ലാ ലിഗ കിരീടവിജയാഘോഷത്തിനിടെ ബാഴ്സലോണയുടെ യുവതാരം ലാമിൻ യമാൽ പലസ്തീൻ പതാക ഉയർത്തിപ്പിടിച്ചത് വലിയ ചർച്ചകൾക്ക് വഴിവെച്ചിരിക്കുകയാണ്. തിങ്കളാഴ്ച നടന്ന ഓപ്പൺ ടോപ്പ് ബസ് പരേഡിനിടെയാണ് പതിനെട്ടുകാരനായ താരം പലസ്തീന് ഐക്യദാർഢ്യം പ്രകടിപ്പിച്ചത്. മൊറോക്കോ, ഇക്വറ്റോറിയൽ ഗിനിയ വംശജരായ മാതാപിതാക്കളുടെ മകനായ യമാൽ പതാക വീശുന്ന ദൃശ്യങ്ങൾ ഇതിനോടകം സാമൂഹികമാധ്യമങ്ങളിൽ വൈറലായി മാറിയിട്ടുണ്ട്.
ഞായറാഴ്ച റയൽ മാഡ്രിഡിനെ എതിരില്ലാത്ത രണ്ട് ഗോളുകൾക്ക് പരാജയപ്പെടുത്തിയാണ് ബാഴ്സലോണ ഇത്തവണത്തെ ലാ ലിഗ കിരീടം സ്വന്തമാക്കിയത്. ഈ വിജയത്തിന്റെ ആവേശത്തിനിടയിലാണ് യമാലിന്റെ ശ്രദ്ധേയമായ ഈ നീക്കം ഉണ്ടായത്. താരത്തിന്റെ നിലപാടിനെ അനുകൂലിച്ചും വിമർശിച്ചും ആരാധകർ സമൂഹമാധ്യമങ്ങളിൽ രണ്ട് തട്ടിലായിരിക്കുകയാണ്.
യമാലിന്റെ ഈ നടപടി ധീരമായ ഒന്നാണെന്നും, തനിക്ക് ലഭിച്ച സ്വാധീനം കൃത്യമായി ഉപയോഗിക്കാൻ താരം മടിക്കുന്നില്ലെന്നും ഒരു വിഭാഗം ആരാധകർ അഭിപ്രായപ്പെടുന്നു. പ്രശസ്ത എക്സ് അക്കൗണ്ടായ മരിയോ നൗഫൽ ഉൾപ്പെടെയുള്ളവർ താരത്തിന്റെ നിലപാടിനെ പരസ്യമായി പ്രശംസിച്ചു. 2023 ഒക്ടോബറിൽ ഗാസയിൽ ഇസ്രയേൽ ആക്രമണം ആരംഭിച്ചതുമുതൽ ബാഴ്സലോണ നഗരം പലസ്തീൻ അനുകൂല പ്രതിഷേധങ്ങൾക്ക് പലതവണ വേദിയായിട്ടുണ്ട്.
അതേസമയം, കായിക വേദിയിൽ ഇത്തരം രാഷ്ട്രീയ നിലപാടുകൾ ഉയർത്തുന്നതിനെതിരെ കടുത്ത വിമർശനവും ഉയരുന്നുണ്ട്. കായിക മത്സരങ്ങളുടെ ആഘോഷവേളയിൽ ഇത്തരം പതാകകൾ ഉയർത്തുന്നത് ശരിയല്ലെന്നും, ഇത് കായികരംഗത്തിന്റെ അന്തസ്സിന് ചേർന്നതല്ലെന്നും വിമർശകർ വാദിക്കുന്നു. ഏപ്രിൽ അവസാനമേറ്റ പരിക്കിനെത്തുടർന്ന് വിശ്രമത്തിലായ യമാൽ, ജൂൺ 11-ന് ആരംഭിക്കുന്ന ലോകകപ്പിന് മുന്നോടിയായി പൂർണ കായികക്ഷമത കൈവരിക്കുമെന്ന പ്രതീക്ഷയിലാണ് ആരാധകർ.
Photo and News Source: Mathrubhumi
