സീനിയർ ജേണലിസ്റ്റ്സ് ഫോറം കേരളയുടെ പുതിയ സംസ്ഥാന കമ്മിറ്റി ഓഫീസ് കോഴിക്കോട് ടൗൺ ഹാൾ റോഡിലുള്ള മഹാത്മജി മെമ്മോറിയൽ ട്രസ്റ്റ് കെട്ടിടത്തിൽ പ്രവർത്തനം ആരംഭിച്ചു. സീനിയർ ജേണലിസ്റ്റ് ഫെഡറേഷൻ ഓഫ് ഇന്ത്യ പ്രസിഡൻ്റ് സന്ദീപ് ദീക്ഷിത് ഭദ്രദീപം കൊളുത്തി ഓഫീസ് ഉദ്ഘാടനം നിർവഹിച്ചു.
ചടങ്ങിൽ ഫോറം രക്ഷാധികാരി സി. എം കൃഷ്ണപണിക്കർ അധ്യക്ഷത വഹിച്ചു. സംസ്ഥാന വൈസ് പ്രസിഡൻ്റ് ഹരിദാസൻ പാലയിൽ സന്ദീപ് ദീക്ഷിതിനെ ഷോൾ അണിയിച്ച് ആദരിച്ചു. മാധ്യമപ്രവർത്തകരുടെ കൂട്ടായ്മയെ ശക്തിപ്പെടുത്തുന്നതിനും പ്രവർത്തനങ്ങൾ ഏകോപിപ്പിക്കുന്നതിനുമുള്ള സുപ്രധാന ചുവടുവെപ്പാണ് ഈ പുതിയ ഓഫീസ്.
ഫോറം രക്ഷാധികാരി എ മാധവൻ, സീനിയർ ജേണലിസ്റ്റ്സ് ഫെഡറേഷൻ ഓഫ് ഇന്ത്യ സെക്രട്ടറി ജനറൽ എൻ.പി ചെക്കുട്ടി, വൈസ് പ്രസിഡൻ്റുമാരായ സണ്ണി ജോസഫ്, സെക്രട്ടറിമാരായ പി അജയകുമാർ, ഫ്രാങ്കോ ലൂയീസ്, സി.കെ. ഹസ്സൻ കോയ, പി ബാലകൃഷ്ണൻ, ട്രഷറർ സി അബ്ദുറഹിമാൻ എന്നിവർ ചടങ്ങിൽ പങ്കെടുത്തു. കൂടാതെ അഡ്വ. കെ. സി. രാജഗോപാൽ ഉൾപ്പെടെയുള്ള പ്രമുഖരും ആശംസകൾ നേർന്നു.
സംസ്ഥാന ജനറൽ സെക്രട്ടറി കെ.പി. വിജയകുമാർ ചടങ്ങിൽ സ്വാഗതം ആശംസിച്ചു. കോഴിക്കോട് ജില്ലാ സെക്രട്ടറി എം സുധീന്ദ്രകുമാർ നന്ദി പ്രകാശിപ്പിച്ചു. മാധ്യമരംഗത്തെ മുതിർന്ന പ്രവർത്തകരുടെ ഒത്തുചേരലിനും ആശയവിനിമയത്തിനും ഈ ഓഫീസ് വേദിയാകും.
Photo and News Source: Kairali News
