പയ്യന്നൂരിലെ എൽഡിഎഫ് സ്ഥാനാർഥിക്കെതിരെയും തിരഞ്ഞെടുപ്പ് ഫലപ്രഖ്യാപനത്തിന് ശേഷം പാർട്ടി നേതാക്കൾക്കെതിരെയും നടക്കുന്ന സൈബർ ആക്രമണങ്ങൾക്കെതിരെ ശക്തമായ പ്രതിഷേധവുമായി സിപിഎം കണ്ണൂർ ജില്ലാ സെക്രട്ടറിയേറ്റ് രംഗത്ത്. വ്യാജ ഐഡികൾ ഉപയോഗിച്ച് നടത്തുന്ന ഇത്തരം പ്രചരണങ്ങൾ പാർട്ടി ഐക്യത്തെ തകർക്കാനുള്ള ആസൂത്രിതമായ ഗൂഢനീക്കമാണെന്ന് ജില്ലാ സെക്രട്ടറി കെ.കെ. രാഗേഷ് വ്യക്തമാക്കി.
ബിഹാറിലും മറ്റ് ഇതര സംസ്ഥാനങ്ങളിലും രജിസ്റ്റർ ചെയ്ത ഫോൺ നമ്പറുകൾ ഉപയോഗിച്ചാണ് പാർട്ടി നേതാക്കൾക്കെതിരെ കള്ളപ്രചരണങ്ങൾ അഴിച്ചുവിടുന്നത്. തിരഞ്ഞെടുപ്പ് പരാജയത്തിന് ഉത്തരവാദികൾ പാർട്ടി നേതാക്കളാണെന്ന് വരുത്തിത്തീർക്കാൻ ഫോട്ടോകൾ സഹിതം വ്യാജ വാർത്തകൾ പ്രചരിപ്പിക്കുന്നു. പയ്യന്നൂരിലെ എൽഡിഎഫ് സ്ഥാനാർഥിക്കെതിരെ ഹീനമായ വ്യക്തിഹത്യ നടത്തിയത് യുഡിഎഫ് സ്ഥാനാർഥിയുടെ സോഷ്യൽ മീഡിയ സംഘമാണെന്നും പാർട്ടി ആരോപിക്കുന്നു.
ഇത്തരം പ്രചരണങ്ങൾ ജനങ്ങൾ പൂർണ്ണമായും തള്ളിക്കളയണമെന്ന് സിപിഎം ആവശ്യപ്പെട്ടു. പാർട്ടിയെ സ്നേഹിക്കുന്ന പ്രവർത്തകർ ഇത്തരം കെണികളിൽ വീഴരുതെന്നും, ശത്രുക്കൾ നടത്തുന്ന വ്യാജ പ്രചാരണങ്ങൾ പ്രചരിപ്പിക്കരുതെന്നും നേതൃത്വം അഭ്യർത്ഥിച്ചു. വ്യാജ ഐഡികൾ ഉപയോഗിച്ച് സിപിഎമ്മിനും നേതാക്കൾക്കും എതിരെ നടത്തുന്ന ഹീനമായ നീക്കങ്ങൾക്കെതിരെ നിയമനടപടികൾ സ്വീകരിക്കുമെന്നും ജില്ലാ സെക്രട്ടറിയേറ്റ് അറിയിച്ചു.
Photo and News Source: Mathrubhumi
