ലണ്ടനിൽ നായർ സർവീസ് സൊസൈറ്റിയുടെ (NSS) നേതൃത്വത്തിൽ യു.കെ.യിൽ വിഷു ആഘോഷങ്ങൾ വിപുലമായി സംഘടിപ്പിച്ചു. മെയ് രണ്ടിന് ഹെർട്ഫോർഡ്ഷെയറിലെ പോട്ടേഴ്സ് ബാറിലുള്ള ഗ്രേസ് വുഡ് അക്കാദമിയിൽ വെച്ചാണ് പരിപാടികൾ നടന്നത്. കർണാടക സംഗീതജ്ഞനും പ്രശസ്ത പടയണി കലാകാരനുമായ അനു വി. കടമ്മനിട്ടയുടെ നേതൃത്വത്തിൽ അവതരിപ്പിച്ച പടയണി പ്രകടനം ആഘോഷങ്ങൾക്ക് സവിശേഷമായ ചാരുത പകർന്നു.
വിഷുക്കണി ദർശനം, കൈനീട്ടം, പരമ്പരാഗത സദ്യ എന്നിവ പ്രവാസി മലയാളികൾക്ക് നാട്ടിലെ വിഷുവിന്റെ ഓർമ്മകൾ ഉണർത്തുന്നതായി. 'സംഗീത സമന്വയം' എന്ന സംഗീതാവതരണവും ചടങ്ങിന് മാറ്റുകൂട്ടി. കേരളീയ സംസ്കാരത്തിന് നൽകിയ സമഗ്ര സംഭാവനകൾ പരിഗണിച്ച് അനു വി. കടമ്മനിട്ടയ്ക്ക് എൻ.എസ്.എസ് യു.കെ.യുടെ വാർഷിക 'സംസ്കൃതി പുരസ്കാരം' സമ്മാനിച്ചു. പ്രസിഡന്റ് ജയകുമാർ നായർ പുരസ്കാരം കൈമാറുകയും സ്ഥാപക അംഗം രാധാകൃഷ്ണൻ നായർ പൊന്നാട അണിയിക്കുകയും ചെയ്തു.
കൾച്ചറൽ സെക്രട്ടറി ശുഭ ജന്റിലിന്റെ നേതൃത്വത്തിൽ നടന്ന കലാപരിപാടികൾ ഏറെ ശ്രദ്ധേയമായി. മോഹിനിയാട്ടം, ഭാരതനാട്യം, ഒഡിസ്സി, കഥക് തുടങ്ങിയ ക്ലാസിക്കൽ നൃത്തങ്ങളും ഫ്യൂഷൻ പ്രകടനങ്ങളും ഗാനമേളയും അരങ്ങേറി. ഡോ. ഹേമ സന്തോഷ്, സ്മിത കരുണാകരൻ, അനന്തശ്രീ അരുൺ, ആശ കർത്താ, ലക്ഷ്മി പ്രവീൺ, ലക്ഷ്മി നായർ, പാർവതി നായർ തുടങ്ങിയവർ നൃത്തങ്ങൾ അവതരിപ്പിച്ചു. സിന്ധു രാധാകൃഷ്ണൻ, കിരൺ കൃഷ്ണ, നിഹാരിക ജയകൃഷ്ണൻ എന്നിവരുടെ പ്രകടനങ്ങളും ഹരീഷ് നായർ ഉൾപ്പെടെയുള്ളവരുടെ ഗാനങ്ങളും സദസ്സിന് വിരുന്നായി.
പ്രസിഡന്റ് ജയകുമാർ നായർ അധ്യക്ഷത വഹിച്ച ചടങ്ങിൽ സെക്രട്ടറി ജയകൃഷ്ണൻ നായർ, മെമ്പർഷിപ് സെക്രട്ടറി നന്ദു കൃഷ്ണൻ, അൽക്ക രാമചന്ദ്രൻ, ചാരു രാധാകൃഷ്ണൻ തുടങ്ങിയവർ സംസാരിച്ചു. യു.കെ.യുടെ വിവിധ ഭാഗങ്ങളിൽ നിന്നുള്ള നിരവധി മലയാളികൾ പങ്കെടുത്ത പരിപാടി പ്രവാസി സമൂഹത്തിന്റെ ഒത്തുകൂടലിന് വേദിയായി.
Photo and News Source: Mathrubhumi
