കോൺഗ്രസ് ഹൈക്കമാൻഡിന്റെ നിർദ്ദേശങ്ങളെ വെല്ലുവിളിച്ചുകൊണ്ട് സംസ്ഥാനത്ത് വീണ്ടും ഫ്ലക്സ് ബോർഡ് വിവാദം. പ്രതിപക്ഷ നേതാവ് വി ഡി സതീശനെ അനുകൂലിച്ചുകൊണ്ട് പുനലൂർ കെഎസ്ആർടിസി ജങ്ഷനിലാണ് പുതിയ ഫ്ലക്സ് ബോർഡ് പ്രത്യക്ഷപ്പെട്ടത്. കഴിഞ്ഞ ദിവസം രാത്രിയോടെയാണ് അജ്ഞാതർ ബോർഡ് സ്ഥാപിച്ചതെന്നാണ് പ്രാഥമിക വിവരം. ആരാണ് ഇതിന് പിന്നിലെന്ന് ഇതുവരെ വ്യക്തത വന്നിട്ടില്ല.
പുനലൂർ നഗരത്തിൽ നേരത്തെ കെ സി വേണുഗോപാലിനെ അനുകൂലിച്ചുകൊണ്ട് സ്ഥാപിച്ചിരുന്ന ഫ്ലക്സ് ബോർഡുകൾ നീക്കം ചെയ്തിരുന്നു. ഇതിനു പിന്നാലെയാണ് വി ഡി സതീശനെ പിന്തുണച്ചുകൊണ്ടുള്ള ബോർഡുകൾ ഉയർന്നുവന്നത്. പാർട്ടിയിലെ ഗ്രൂപ്പ് പോരും നേതൃത്വത്തെ ചൊല്ലിയുള്ള തർക്കങ്ങളും വീണ്ടും പരസ്യമാകുന്നതിലേക്കാണ് ഈ സംഭവങ്ങൾ വിരൽ ചൂണ്ടുന്നത്.
അതേസമയം, ആലപ്പുഴയിലും സമാനമായ സംഭവങ്ങൾ റിപ്പോർട്ട് ചെയ്യപ്പെടുന്നുണ്ട്. ആലപ്പുഴ ആശ്രമം ജങ്ഷനിൽ 'കേരളത്തിന്റെ ക്യാപ്റ്റൻ കെ സി' എന്ന പേരിൽ കെ സി വേണുഗോപാലിനെ അനുകൂലിച്ചുള്ള ഫ്ലക്സ് ബോർഡ് വീണ്ടും പ്രത്യക്ഷപ്പെട്ടു. പാർട്ടി നിർദ്ദേശപ്രകാരം നേരത്തെ നീക്കം ചെയ്ത ബോർഡുകൾക്ക് പകരമായാണ് വീണ്ടും പുതിയവ സ്ഥാപിച്ചിരിക്കുന്നത്. കോൺഗ്രസ് നേതൃത്വത്തിന്റെ കർശന നിർദ്ദേശങ്ങൾക്കിടയിലും പ്രവർത്തകർക്കിടയിലെ ഭിന്നത തുടരുന്നുവെന്നതിന്റെ തെളിവാണ് ഈ സംഭവങ്ങൾ.
Photo and News Source: Kairali News
