കേരളത്തിലെ മുഖ്യമന്ത്രിയെ നിശ്ചയിക്കുന്നതിലെ കാലതാമസത്തെ പരിഹസിച്ച പ്രധാനമന്ത്രി നരേന്ദ്ര മോദിക്ക് മറുപടിയുമായി മുതിർന്ന കോൺഗ്രസ് നേതാവ് രമേശ് ചെന്നിത്തല രംഗത്തെത്തി. തിരഞ്ഞെടുപ്പ് ഫലം വന്ന് അഞ്ചു ദിവസങ്ങൾക്കുള്ളിൽ തന്നെ ഇത്തരം വിമർശനങ്ങൾ ഉന്നയിക്കുന്ന പ്രധാനമന്ത്രി, ഡൽഹിയിൽ മുഖ്യമന്ത്രിയെ പ്രഖ്യാപിക്കാൻ 50 ദിവസത്തോളം എടുത്ത കാര്യം ഓർക്കണമെന്ന് അദ്ദേഹം മാധ്യമങ്ങളോട് പറഞ്ഞു.
അന്ന് ഡൽഹിയിൽ മുഖ്യമന്ത്രിയെ പ്രഖ്യാപിക്കാതെ അനിശ്ചിതത്വം സൃഷ്ടിച്ച പ്രധാനമന്ത്രിയാണ് ഇപ്പോൾ കോൺഗ്രസിനെ വിമർശിക്കുന്നത് എന്ന് ചെന്നിത്തല കുറ്റപ്പെടുത്തി. കോൺഗ്രസ് ഒരു ജനാധിപത്യ പാർട്ടിയാണെന്നും, ഏകാധിപത്യ രീതിയിൽ പ്രവർത്തിക്കുന്ന പാർട്ടിയല്ലെന്നും അദ്ദേഹം വ്യക്തമാക്കി. നാഗ്പൂരിലെ ആസ്ഥാനത്തുനിന്നുള്ള നിർദേശങ്ങൾക്കനുസരിച്ച് മാത്രം പ്രവർത്തിക്കുന്ന രീതിയല്ല കോൺഗ്രസിന്റേതെന്ന് അദ്ദേഹം കൂട്ടിച്ചേർത്തു.
പാർട്ടിയിലെ എല്ലാ നേതാക്കളുമായും ചർച്ചകൾ നടത്തി ജനാധിപത്യപരമായ രീതിയിൽ മാത്രമേ അന്തിമ തീരുമാനമെടുക്കൂ എന്ന് ഹൈക്കമാൻഡ് വ്യക്തമാക്കിയിട്ടുണ്ട്. എത്രയും വേഗത്തിൽ തന്നെ ഹൈക്കമാൻഡ് മുഖ്യമന്ത്രിയെ സംബന്ധിച്ച അന്തിമ തീരുമാനം കൈക്കൊള്ളുമെന്നും രമേശ് ചെന്നിത്തല മാധ്യമങ്ങളോട് പറഞ്ഞു.
Photo and News Source: Mathrubhumi
