കേരളത്തിലെ മുഖ്യമന്ത്രി സ്ഥാനത്തെ ചൊല്ലിയുള്ള തർക്കങ്ങൾ ഇപ്പോൾ ദില്ലിയിലേക്ക് നീങ്ങിയിരിക്കുകയാണ്. പാർലമെന്റ് അംഗമായ കെ.സി. വേണുഗോപാൽ തനിക്ക് സ്ഥാനമാനങ്ങളൊന്നും വേണ്ടെന്ന് ആവർത്തിക്കുമ്പോഴും, അദ്ദേഹത്തിന്റെ പേര് മുഖ്യമന്ത്രി സ്ഥാനത്തേക്ക് ഉയർന്നു കേൾക്കുന്നത് രാഷ്ട്രീയ കേന്ദ്രങ്ങളിൽ വലിയ ചർച്ചയായിട്ടുണ്ട്. 'മണ്ണും ചാരി നിന്നവൻ പെണ്ണും കൊണ്ടുപോയി' എന്ന ചൊല്ലുപോലെ, അപ്രതീക്ഷിതമായി കെ.സി. വേണുഗോപാൽ മുഖ്യമന്ത്രി പദത്തിലേക്ക് എത്തുമോ എന്ന സംശയമാണ് ഇപ്പോൾ ഉയരുന്നത്.
എഐസിസി നിരീക്ഷകൻ മുകുൾ വാസ്നിക്കിന്റെ കൈവശമുണ്ടായിരുന്ന രേഖകൾ പുറത്തുവന്നതോടെയാണ് ഈ ചർച്ചകൾക്ക് ചൂടുപിടിച്ചത്. കെപിസിസി പ്രസിഡന്റ് സണ്ണി ജോസഫ് ഉൾപ്പെടെയുള്ള പ്രമുഖ നേതാക്കൾ കെ.സി. വേണുഗോപാലിനെ പിന്തുണയ്ക്കുന്നതായി ഈ പട്ടികയിൽ കാണാം. തിരഞ്ഞെടുക്കപ്പെട്ട 63 കോൺഗ്രസ് എംഎൽഎമാരിൽ 47 പേരും വേണുഗോപാലിന്റെ പേരാണ് നിർദ്ദേശിച്ചതെന്നാണ് വിവരം. രമേശ് ചെന്നിത്തലയ്ക്ക് എട്ടും വി.ഡി. സതീശന് ആറും എംഎൽഎമാരുടെ പിന്തുണ മാത്രമാണ് ലഭിച്ചതെന്നും റിപ്പോർട്ടുകൾ സൂചിപ്പിക്കുന്നു.
അതേസമയം, വി.ഡി. സതീശൻ തന്റെ നിലപാടിൽ ഉറച്ചുനിൽക്കുകയാണ്. മുഖ്യമന്ത്രി സ്ഥാനത്തേക്ക് തന്നെ പരിഗണിക്കുന്നില്ലെങ്കിൽ മന്ത്രിസഭയുടെ ഭാഗമാകാനില്ലെന്ന് അദ്ദേഹം ഹൈക്കമാൻഡിനെ അറിയിച്ചിട്ടുണ്ട്. വെറും എംഎൽഎയായി തുടരാനാണ് താൽപ്പര്യമെന്നും അദ്ദേഹം വ്യക്തമാക്കി. കെ. സുധാകരൻ മുന്നോട്ടുവെച്ച സമവായ ഫോർമുലയും സതീശൻ തള്ളിക്കളഞ്ഞു. കെ.സി. വേണുഗോപാലിനെ മുഖ്യമന്ത്രിയാക്കി മറ്റുള്ളവർക്ക് പ്രധാന വകുപ്പുകൾ നൽകി ഒത്തുതീർപ്പിലെത്താനുള്ള നീക്കമാണ് സതീശൻ എതിർക്കുന്നത്.
എംഎൽഎമാരുടെയും എംപിമാരുടെയും പിന്തുണയുടെ കാര്യത്തിൽ കെ.സി. വേണുഗോപാലിന് വ്യക്തമായ മുൻതൂക്കമുണ്ട്. രാഹുൽ ഗാന്ധിയുടെയും സോണിയ ഗാന്ധിയുടെയും പിന്തുണയും അദ്ദേഹത്തിന് അനുകൂലമാണെന്നാണ് വിലയിരുത്തൽ. ഭൂരിഭാഗം നേതൃത്വത്തിന്റെയും പിന്തുണ തനിക്കുണ്ടെന്ന് കെ.സി. പക്ഷം അവകാശപ്പെടുമ്പോൾ, ഹൈക്കമാൻഡ് എന്ത് തീരുമാനമെടുക്കുമെന്ന ആകാംക്ഷയിലാണ് കേരളത്തിലെ കോൺഗ്രസ് പ്രവർത്തകർ.
Photo and News Source: Janmabhumi
.png)