ദൈനംദിന പാചകത്തിൽ ഒഴിച്ചുകൂടാനാവാത്ത ഒന്നാണ് മസാലകൾ. പലപ്പോഴും വിലക്കുറവ് ലഭിക്കുന്നതിനായി വലിയ അളവിൽ മസാലകൾ വാങ്ങി സൂക്ഷിക്കാറുണ്ട്. എന്നാൽ ശരിയായ രീതിയിൽ സൂക്ഷിച്ചില്ലെങ്കിൽ ഇവ പെട്ടെന്ന് പൂപ്പൽ പിടിക്കാനും കേടായി പോകാനും സാധ്യതയുണ്ട്. മസാലകളുടെ ഗുണമേന്മയും സ്വാദും മാസങ്ങളോളം നിലനിർത്താൻ ചില കാര്യങ്ങൾ ശ്രദ്ധിക്കേണ്ടതുണ്ട്.
ഏറ്റവും പ്രധാനപ്പെട്ട കാര്യം മസാലകൾ സൂക്ഷിക്കുന്ന പാത്രങ്ങളാണ്. നനവ് ഒട്ടും തട്ടാത്ത എയർ ടൈറ്റ് കുപ്പികളിൽ വേണം ഇവ സൂക്ഷിക്കാൻ. ഈർപ്പം തട്ടിയാൽ മസാലകൾ പെട്ടെന്ന് കേടാകാൻ സാധ്യതയുണ്ട്. അതിനാൽ ഉപയോഗിക്കുമ്പോൾ നനവുള്ള സ്പൂണുകൾ ഉപയോഗിക്കാതിരിക്കാൻ പ്രത്യേകം ശ്രദ്ധിക്കുക.
സൂര്യപ്രകാശം നേരിട്ട് ഏൽക്കുന്ന ജനാലയ്ക്കരികിലോ അടുപ്പിന് തൊട്ടടുത്തോ മസാലക്കുപ്പികൾ വെക്കരുത്. ചൂടും വെളിച്ചവും മസാലകളുടെ സ്വാദിനെയും നിറത്തെയും ദോഷകരമായി ബാധിക്കും. തണുപ്പുള്ളതും ഉണങ്ങിയതുമായ സ്ഥലങ്ങളിൽ വേണം ഇവ സൂക്ഷിക്കാൻ.
മസാലകൾ പൊടിച്ച് സൂക്ഷിക്കുന്നതിനേക്കാൾ നല്ലത് അവ മുഴുവനായി (Whole spices) സൂക്ഷിക്കുന്നതാണ്. ആവശ്യാനുസരണം മാത്രം പൊടിച്ച് ഉപയോഗിക്കുന്നത് കൂടുതൽ കാലം കേടുകൂടാതെ ഇരിക്കാൻ സഹായിക്കും. കൂടാതെ, ഒരുപാട് കാലത്തേക്ക് ഒരുമിച്ച് വാങ്ങി വെക്കുന്നതിന് പകരം ചെറിയ അളവിൽ വാങ്ങി ഉപയോഗിക്കുന്നതാണ് ഏറ്റവും ഉചിതം. ഇത് മസാലകളുടെ സുഗന്ധവും ഗുണവും നഷ്ടപ്പെടാതെ നിലനിർത്താൻ സഹായിക്കും.
Photo and News Source: Samakalika Malayalam
