തമിഴ്നാട് രാഷ്ട്രീയത്തിൽ നിർണായക വഴിത്തിരിവ്. നടൻ വിജയുടെ നേതൃത്വത്തിലുള്ള തമിഴക വെട്രി കഴകം (TVK) സർക്കാർ രൂപീകരണത്തിനായുള്ള മാന്ത്രിക സംഖ്യയിലേക്ക് അടുക്കുന്നു. സിപിഎമ്മിന്റെയും സിപിഐയുടെയും പിന്തുണ ഔദ്യോഗികമായി ഉറപ്പിച്ചതോടെ വിജയ് മുഖ്യമന്ത്രിയാകാനുള്ള സാധ്യതകൾ വർധിച്ചു. ഇടതുപക്ഷ പാർട്ടികൾക്ക് തൊഴിൽ വകുപ്പ് ഉൾപ്പെടെയുള്ള മന്ത്രിസ്ഥാനങ്ങൾ നൽകാൻ ടിവികെ നേതൃത്വം ധാരണയിലെത്തിയിട്ടുണ്ട്.
നിലവിൽ 116 എംഎൽഎമാരുടെ പിന്തുണ ടിവികെയ്ക്ക് ലഭിച്ചതായാണ് റിപ്പോർട്ടുകൾ. കേവല ഭൂരിപക്ഷമായ 118 എന്ന സംഖ്യയിലേക്ക് എത്താൻ വിസികെയുടെ (VCK) പിന്തുണ കൂടി അനിവാര്യമാണ്. വിസികെ നേതാവ് തിരുമാവളവന് മന്ത്രിസ്ഥാനം വാഗ്ദാനം ചെയ്തുകൊണ്ട് ടിവികെ ചർച്ചകൾ സജീവമാക്കിയിട്ടുണ്ട്. ഈ പിന്തുണ കൂടി ലഭിച്ചാൽ വിജയ്ക്ക് ഭൂരിപക്ഷം തെളിയിക്കാൻ സാധിക്കും.
നേരത്തെ, ഭൂരിപക്ഷം തെളിയിക്കാൻ സാധിക്കാത്ത സാഹചര്യത്തിൽ വിജയിക്ക് സർക്കാർ രൂപീകരിക്കാൻ കഴിയില്ലെന്ന് ഗവർണർ രാജേന്ദ്ര അർലേക്കർ വ്യക്തമാക്കിയിരുന്നു. 118 എംഎൽഎമാരുടെ പിന്തുണയില്ലാതെ സ്ഥിരതയുള്ള സർക്കാർ എങ്ങനെ സാധ്യമാകുമെന്നായിരുന്നു ഗവർണറുടെ ചോദ്യം. ഇതിനെത്തുടർന്ന് ഡിഎംകെ പിന്തുണയോടെ എഐഎഡിഎംകെ സർക്കാർ രൂപീകരിക്കാനുള്ള നീക്കങ്ങളും സജീവമായിരുന്നു.
എന്നാൽ, ഇടതുപക്ഷ പാർട്ടികളുടെ പിന്തുണ ഉറപ്പാക്കിയതോടെ ഈ പ്രതിസന്ധി മറികടക്കാൻ ടിവികെയ്ക്ക് സാധിച്ചു. എൻഡിഎ കക്ഷികളുമായി യാതൊരു ബന്ധവുമില്ലെന്നും, പിന്തുണ നൽകുന്ന പാർട്ടികൾക്ക് മന്ത്രിസ്ഥാനം നൽകുമെന്നും വിജയ് ഉറപ്പുനൽകിയിട്ടുണ്ട്. ഭൂരിപക്ഷം തെളിയിക്കുന്നതിനായി വിജയ് ഇന്ന് വീണ്ടും ഗവർണറെ കാണാൻ ലോക്ഭവനിൽ എത്തുമെന്നാണ് വിവരം. ഔദ്യോഗിക പ്രഖ്യാപനം ഉടൻ ഉണ്ടാകുമെന്നാണ് പാർട്ടി വൃത്തങ്ങൾ നൽകുന്ന സൂചന.
Photo and News Source: Asianet News
