ഇന്നത്തെ കാലത്ത് മാനസിക സമാധാനം എന്നത് വളരെ അപൂർവമായ ഒന്നായി മാറിക്കഴിഞ്ഞു. മാനസിക സമ്മർദം നമ്മെ ശാരീരികമായും മാനസികമായും തളർത്തുന്നു. പലപ്പോഴും വലിയ പ്രതിസന്ധികളിൽ നിന്നല്ല, മറിച്ച് നാം പോലും അറിയാതെ നമ്മുടെ ദൈനംദിന ജീവിതത്തിന്റെ ഭാഗമായി മാറുന്ന ചില ചെറിയ ശീലങ്ങളാണ് നമ്മുടെ മാനസികാരോഗ്യത്തെ തകർക്കുന്നത്. ഇവ തിരിച്ചറിഞ്ഞ് തിരുത്തേണ്ടത് അത്യാവശ്യമാണ്.
രാവിലെ ഉറക്കമുണർന്ന ഉടൻ മൊബൈൽ ഫോൺ പരിശോധിക്കുന്നത് തലച്ചോറിന്റെ പ്രവർത്തനത്തെ ദോഷകരമായി ബാധിക്കുന്നു. മനസ്സ് പൂർണമായി ഉണരുന്നതിന് മുൻപ് തന്നെ ലോകത്തെ നെഗറ്റീവ് വാർത്തകളിലേക്കും മറ്റുള്ളവരുടെ ആവശ്യങ്ങളിലേക്കും ശ്രദ്ധ തിരിക്കുന്നത് ദിവസം മുഴുവൻ അസ്വസ്ഥത ഉണ്ടാക്കും. അതുപോലെ, താൽപ്പര്യമില്ലാതെ മറ്റുള്ളവരെ പ്രീതിപ്പെടുത്താൻ പറയുന്ന 'യെസ്' മനസ്സിൽ വലിയൊരു ഭാരം അടിച്ചേൽപ്പിക്കുന്നു. ഇത്തരം അമിത ബാധ്യതകൾ കാലക്രമേണ കടുത്ത മാനസിക സമ്മർദത്തിന് വഴിവെക്കുന്നു.
പകൽ മുഴുവൻ ജോലി ചെയ്ത ശേഷം രാത്രിയിൽ വീണ്ടും ഫോണിന് മുന്നിലിരിക്കുന്നത് തലച്ചോറിന് വലിയ സമ്മർദം നൽകുന്നു. സ്ക്രീനിൽ നിന്നുള്ള നീല വെളിച്ചം ഉറക്കത്തിന് സഹായിക്കുന്ന മെലറ്റോണിൻ ഹോർമോണിന്റെ ഉൽപാദനത്തെ തടസ്സപ്പെടുത്തുന്നു. ഇത് ഉറക്കമില്ലായ്മയിലേക്കും അടുത്ത ദിവസം രാവിലെ അനുഭവപ്പെടുന്ന കടുത്ത ക്ഷീണത്തിലേക്കും നയിക്കുന്നു. വിശ്രമത്തെ ഒരു ആഡംബരമായി കാണാതെ, അതൊരു അനിവാര്യതയായി കണ്ട് കൃത്യമായി വിശ്രമിക്കാൻ ശ്രദ്ധിക്കുക.
പ്രശ്നങ്ങളെക്കുറിച്ച് ആവർത്തിച്ച് സംസാരിക്കുന്നത് ഗുണത്തേക്കാളേറെ ദോഷം ചെയ്യും. ഒരു നടപടിയും എടുക്കാതെ പ്രശ്നങ്ങളെക്കുറിച്ച് മാത്രം ചിന്തിക്കുന്നത് മനസ്സിനെ നിസ്സഹായാവസ്ഥയിലാക്കുന്നു. പരിഹാരത്തിനായി ചെറിയൊരു ചുവടുവെപ്പെങ്കിലും നടത്തുന്നത് ആത്മവിശ്വാസം നൽകും. കൂടാതെ, ഭക്ഷണം ഒഴിവാക്കുന്നതോ തിരക്കിട്ട് കഴിക്കുന്നതോ രക്തത്തിലെ പഞ്ചസാരയുടെ അളവിൽ മാറ്റമുണ്ടാക്കി പെട്ടെന്നുള്ള ദേഷ്യത്തിനും ഉത്കണ്ഠയ്ക്കും കാരണമാകുന്നു. മനസ്സിനെ നിയന്ത്രിക്കാൻ ശരീരത്തിന് കൃത്യമായ ഇന്ധനം അഥവാ പോഷകാഹാരം അത്യാവശ്യമാണ്.
Photo and News Source: Samakalika Malayalam
