തമിഴ്നാട്ടിൽ സർക്കാർ രൂപീകരണവുമായി ബന്ധപ്പെട്ട രാഷ്ട്രീയ അനിശ്ചിതത്വം തുടരുന്നതിനിടെ, നിർണായക നീക്കങ്ങളുമായി കോൺഗ്രസ് നേതൃത്വം രംഗത്തെത്തി. ടിവികെ (TVK) നേതാവ് വിജയിക്ക് പിന്തുണ നൽകണമെന്ന് ആവശ്യപ്പെട്ട് കോൺഗ്രസ് അധ്യക്ഷൻ മല്ലികാർജുൻ ഖർഗെ, വിടുതലൈ ചിറുതൈകൾ കച്ചി (VCK) നേതാവ് തിരുമാവളവനെ നേരിട്ട് ഫോണിൽ ബന്ധപ്പെട്ടു. തമിഴ്നാട്ടിൽ സർക്കാർ രൂപീകരിക്കാൻ വിജയിയെ പിന്തുണയ്ക്കണമെന്ന അഭ്യർത്ഥനയാണ് ഖർഗെ മുന്നോട്ടുവെച്ചത്. എന്നാൽ, ഇക്കാര്യം പാർട്ടിയിൽ ആലോചിച്ച ശേഷം തീരുമാനിക്കാമെന്നാണ് തിരുമാവളവൻ മറുപടി നൽകിയതെന്ന് വിസികെ വൃത്തങ്ങൾ വ്യക്തമാക്കുന്നു.
വിജയിയുടെ നേതൃത്വത്തിലുള്ള ടിവികെയ്ക്ക് പിന്തുണ നൽകുന്ന കാര്യത്തിൽ വിസികെയിൽ ഭിന്നത രൂക്ഷമാണ്. രണ്ട് എംഎൽഎമാരുള്ള പാർട്ടിയിൽ ഈ നീക്കത്തിനെതിരെ ശക്തമായ അഭിപ്രായവ്യത്യാസങ്ങൾ നിലനിൽക്കുന്നുണ്ട്. പിന്തുണ ആവശ്യപ്പെട്ടുകൊണ്ടുള്ള ടിവികെയുടെ കത്ത് ചർച്ച ചെയ്യുന്നതിനായി സിപിഎം, സിപിഐ നേതൃയോഗങ്ങൾ ചെന്നൈയിൽ പുരോഗമിക്കുകയാണ്. വൈകിയാലും വിജയ് സർക്കാർ അധികാരത്തിൽ വരുമെന്ന ആത്മവിശ്വാസത്തിലാണ് ടിവികെ ജനറൽ സെക്രട്ടറി അരുൺരാജ്.
അതേസമയം, വിജയിക്ക് ഭൂരിപക്ഷമില്ലെന്ന് ഗവർണർ രാജേന്ദ്ര അർലേക്കർ വ്യക്തമാക്കിയത് ടിവികെയ്ക്ക് വലിയ വെല്ലുവിളിയാണ്. 118 എംഎൽഎമാരുടെ പിന്തുണയില്ലാതെ സ്ഥിരതയുള്ള സർക്കാർ എങ്ങനെ സാധ്യമാകുമെന്നാണ് ഗവർണറുടെ ചോദ്യം. വിജയിക്ക് ഭൂരിപക്ഷം തെളിയിക്കാൻ സാധിച്ചില്ലെങ്കിൽ, ഡിഎംകെ പിന്തുണയോടെ എഐഎഡിഎംകെ സർക്കാർ രൂപീകരിക്കാനുള്ള സാധ്യതകളും സജീവമാണ്. സിപിഎം, സിപിഐ, മുസ്ലീം ലീഗ്, വിസികെ തുടങ്ങിയ പാർട്ടികളുടെ പിന്തുണ ഉറപ്പാക്കാനുള്ള തീവ്രശ്രമത്തിലാണ് ടിവികെ നേതൃത്വം.
Photo and News Source: Asianet News
