കേരളത്തിലെ മുഖ്യമന്ത്രിയെ നിശ്ചയിക്കുന്ന കാര്യത്തില് കോണ്ഗ്രസ് എംഎല്എമാരുടെ അഭിപ്രായത്തിനാണ് ഏറ്റവും വലിയ പ്രാധാന്യമെന്ന് ഹൈക്കമാന്ഡ് നിരീക്ഷകന് അജയ് മാക്കന് വ്യക്തമാക്കി. എംഎല്എമാരുമായി നേരിട്ട് സംസാരിച്ച് അവരുടെ അഭിപ്രായങ്ങള് തേടിയതായും, ഈ വിവരങ്ങള് ക്രോഡീകരിച്ച് കോണ്ഗ്രസ് ദേശീയ നേതൃത്വത്തിന് കൈമാറിയതായും അദ്ദേഹം അറിയിച്ചു. മുഖ്യമന്ത്രിയെ തീരുമാനിക്കാനുള്ള അധികാരം ഹൈക്കമാന്ഡിന് വിട്ടുനല്കിക്കൊണ്ടുള്ള പ്രമേയം നിയമസഭാകക്ഷിയോഗം ഇതിനകം പാസാക്കിയിട്ടുണ്ട്. റിപ്പോര്ട്ട് വിശദമായി പരിശോധിച്ച ശേഷം ഹൈക്കമാന്ഡ് അന്തിമ തീരുമാനം പ്രഖ്യാപിക്കും.
മുഖ്യമന്ത്രിയെ തീരുമാനിക്കുന്നതില് ഘടകകക്ഷികളുടെ അഭിപ്രായത്തിന് പ്രസക്തിയുണ്ടോ എന്ന മാധ്യമപ്രവര്ത്തകരുടെ ചോദ്യത്തിന്, അവര്ക്ക് ഇതില് യാതൊരു പങ്കുമില്ലെന്നായിരുന്നു അജയ് മാക്കന്റെ മറുപടി. അതേസമയം, എംഎല്എമാരുടെ പിന്തുണ സംബന്ധിച്ച വിവരങ്ങള് രേഖപ്പെടുത്തിയതായി പുറത്തുവന്ന ഫോട്ടോ മറ്റൊരു നിരീക്ഷകനായ മുകുള് വാസ്നിക് നിഷേധിച്ചു. ഫോട്ടോയിലുള്ള വിവരങ്ങള് വസ്തുതാപരമല്ലെന്ന് അദ്ദേഹം വ്യക്തമാക്കി.
അതിനിടെ, മുഖ്യമന്ത്രിയെ തീരുമാനിക്കുന്നതുമായി ബന്ധപ്പെട്ട ചര്ച്ചകള്ക്കായി വി.ഡി. സതീശന്, രമേശ് ചെന്നിത്തല, സണ്ണി ജോസഫ് എന്നിവരെ ഹൈക്കമാന്ഡ് ഡല്ഹിയിലേക്ക് വിളിപ്പിച്ചിട്ടുണ്ട്. നാളെ നടക്കുന്ന നിര്ണായക ചര്ച്ചകള്ക്ക് ശേഷം അന്തിമ തീരുമാനം ഉണ്ടായേക്കും. മുഖ്യമന്ത്രി സ്ഥാനം ലഭിക്കാത്ത നേതാക്കളെ അനുനയിപ്പിക്കാന് ഉപമുഖ്യമന്ത്രി സ്ഥാനം, ആഭ്യന്തരം തുടങ്ങിയ പ്രധാന വകുപ്പുകള് വാഗ്ദാനം ചെയ്തേക്കുമെന്നും സൂചനയുണ്ട്. വി.ഡി. സതീശന് തന്റെ നിലപാടില് ഉറച്ചുനില്ക്കുമോ എന്നത് രാഷ്ട്രീയ കേന്ദ്രങ്ങളില് വലിയ ചര്ച്ചയായിട്ടുണ്ട്. കെ.സി. വേണുഗോപാല് പക്ഷം 47 എംഎല്എമാരുടെ പിന്തുണ അവകാശപ്പെടുമ്പോള്, ഘടകകക്ഷികള് വി.ഡി. സതീശനെ പിന്തുണയ്ക്കുന്നതായാണ് റിപ്പോര്ട്ടുകള്.
Photo and News Source: Samakalika Malayalam
