കേരളത്തിലെ നിയമസഭാ തിരഞ്ഞെടുപ്പിൽ വിജയിച്ച ജനപ്രതിനിധികളിൽ ഭൂരിഭാഗം പേർക്കും ക്രിമിനൽ പശ്ചാത്തലമുണ്ടെന്ന് അസോസിയേഷൻ ഫോർ ഡെമോക്രാറ്റിക് റിഫോംസും (ADR) കേരള ഇലക്ഷൻ വാച്ചും സംയുക്തമായി പുറത്തുവിട്ട റിപ്പോർട്ട് വ്യക്തമാക്കുന്നു. ആകെ 140 വിജയികളിൽ 135 പേരുടെ സത്യവാങ്മൂലങ്ങൾ വിശകലനം ചെയ്തതിൽ നിന്നാണ് ഞെട്ടിക്കുന്ന ഈ വിവരങ്ങൾ പുറത്തുവന്നത്.
റിപ്പോർട്ട് പ്രകാരം, 114 എംഎൽഎമാർ (84 ശതമാനം) തങ്ങൾക്കെതിരെ ക്രിമിനൽ കേസുകളുണ്ടെന്ന് വെളിപ്പെടുത്തിയിട്ടുണ്ട്. 2021-ലെ തിരഞ്ഞെടുപ്പിൽ ഇത് 71 ശതമാനം മാത്രമായിരുന്നു. ഇതിൽ 77 പേർക്കെതിരെ (57 ശതമാനം) ഗുരുതരമായ ക്രിമിനൽ കേസുകൾ നിലവിലുണ്ട്. കൊലപാതക ശ്രമം, വധശ്രമം, സ്ത്രീകൾക്കെതിരായ അതിക്രമങ്ങൾ എന്നിവയുമായി ബന്ധപ്പെട്ട കേസുകൾ ഇതിൽ ഉൾപ്പെടുന്നു.
പാർട്ടി തിരിച്ചുള്ള കണക്കുകൾ പരിശോധിച്ചാൽ, വിജയിച്ച 59 കോൺഗ്രസ് എംഎൽഎമാരിൽ 53 പേർക്കും, സിപിഐഎമ്മിലെ 26 പേരിൽ 20 പേർക്കും, ബിജെപിയിലെ മൂന്ന് പേർക്കും ക്രിമിനൽ കേസുകളുണ്ട്. സാമ്പത്തിക നില പരിശോധിച്ചാൽ, വിശകലനം ചെയ്ത 135 പേരിൽ 93 പേരും (69 ശതമാനം) കോടീശ്വരന്മാരാണ്. എംഎൽഎമാരുടെ ശരാശരി ആസ്തി 2021-ലെ 3.12 കോടിയിൽ നിന്ന് 2026-ൽ 6.94 കോടിയായി വർധിച്ചു.
ഏറ്റവും കൂടുതൽ ആസ്തിയുള്ള എംഎൽഎ കുട്ടനാട്ടിൽ നിന്നുള്ള കേരള കോൺഗ്രസ് സ്ഥാനാർത്ഥി റജി ചെറിയാനാണ് (218 കോടി രൂപ). ബിജെപി നേതാവ് രാജീവ് ചന്ദ്രശേഖർ 111 കോടി രൂപയുടെ ആസ്തിയുമായി രണ്ടാമതും, ഷിബു തെക്കുംപുറം 68 കോടി രൂപയുമായി മൂന്നാമതുമാണ്. അതേസമയം, ഏറ്റവും കൂടുതൽ കടബാധ്യതയുള്ള എംഎൽഎയും രാജീവ് ചന്ദ്രശേഖറാണ്.
Photo and News Source: Janmabhumi
