രാജ്യത്ത് ഡിജിറ്റൽ പേയ്മെന്റ് സംവിധാനങ്ങൾ വ്യാപകമായതോടെ, നികുതിദായകരുടെ വരുമാനവും ചെലവും തമ്മിലുള്ള പൊരുത്തക്കേടുകൾ കണ്ടെത്താൻ കേന്ദ്ര സർക്കാർ നിരീക്ഷണ സംവിധാനം ശക്തമാക്കി. ആദായ നികുതി റിട്ടേണിൽ കാണിക്കുന്ന വരുമാനത്തേക്കാൾ ഉയർന്ന സാമ്പത്തിക ഇടപാടുകൾ നടത്തുന്നവർ ഇനി കൂടുതൽ പരിശോധനകൾ നേരിടേണ്ടി വരും. 1961-ലെ ആദായ നികുതി നിയമപ്രകാരമുള്ള 'സ്റ്റേറ്റ്മെന്റ് ഓഫ് ഫിനാൻഷ്യൽ ട്രാൻസാക്ഷൻസ്' (SFT) വഴിയാണ് ഈ നിരീക്ഷണം നടപ്പിലാക്കുന്നത്.
ബാങ്കുകളും ധനകാര്യ സ്ഥാപനങ്ങളും റിപ്പോർട്ട് ചെയ്യുന്ന ഉയർന്ന മൂല്യമുള്ള ഇടപാടുകൾ ഓരോ വ്യക്തിയുടെയും 'ആന്വൽ ഇൻഫർമേഷൻ സ്റ്റേറ്റ്മെന്റിൽ' (AIS) രേഖപ്പെടുത്തുന്നു. ക്രെഡിറ്റ് കാർഡ് പേയ്മെന്റുകൾ, ഓഹരി നിക്ഷേപങ്ങൾ, ബാങ്ക് നിക്ഷേപങ്ങൾ എന്നിവ ഇതിൽ ഉൾപ്പെടുന്നു. ഈ വിവരങ്ങൾ ഇൻകം ടാക്സ് റിട്ടേണുമായി സ്വയമേവ ഒത്തുനോക്കുകയും, വലിയ വ്യത്യാസങ്ങൾ കണ്ടെത്തിയാൽ സിസ്റ്റം മുന്നറിയിപ്പ് നൽകുകയും ചെയ്യുന്നു. ക്രിപ്റ്റോ കറൻസി ഇടപാടുകളും ഗിഗ് ഇക്കോണമി വഴിയുള്ള വരുമാനവും ഇപ്പോൾ നിരീക്ഷണ വലയത്തിലാണ്.
പുതിയ നിർദേശങ്ങൾ പ്രകാരം എല്ലാ ക്രെഡിറ്റ് കാർഡുകളും പാൻ (PAN) കാർഡുമായി ബന്ധിപ്പിക്കുന്നത് നിർബന്ധമാക്കിയിട്ടുണ്ട്. ഒരു സാമ്പത്തിക വർഷത്തിൽ ക്രെഡിറ്റ് കാർഡ് ബില്ലായി ഒരു ലക്ഷം രൂപയിൽ കൂടുതൽ പണമായി അടയ്ക്കുന്നതും, പത്തു ലക്ഷം രൂപയിൽ കൂടുതൽ മറ്റ് മാർഗ്ഗങ്ങളിലൂടെ അടയ്ക്കുന്നതും SFT വഴി റിപ്പോർട്ട് ചെയ്യപ്പെടും. വ്യക്തികളുടെ ചെറിയ ഇടപാടുകളേക്കാൾ, ബില്ലുകൾ തീർപ്പാക്കാൻ ഉപയോഗിക്കുന്ന തുകയുടെ ഉറവിടത്തിനാണ് നികുതി വകുപ്പ് ഇപ്പോൾ മുൻഗണന നൽകുന്നത്.
നികുതി വകുപ്പ് ഇപ്പോൾ 'നഡ്ജ്' (Nudge) കമ്മ്യൂണിക്കേഷൻ എന്ന രീതിയാണ് പിന്തുടരുന്നത്. പൊരുത്തക്കേടുകൾ കണ്ടെത്തിയാൽ ഉടൻ ശിക്ഷാ നടപടികൾക്ക് പകരം, അത് തിരുത്താനോ വിശദീകരിക്കാനോ നികുതിദായകർക്ക് അവസരം നൽകുന്നു. എന്നാൽ, പണത്തിന്റെ ഉറവിടം വ്യക്തമാക്കാൻ സാധിക്കാത്ത വലിയ ചെലവുകൾ കണ്ടെത്തിയാൽ കർശനമായ നടപടികൾ സ്വീകരിക്കുമെന്ന് അധികൃതർ വ്യക്തമാക്കിയിട്ടുണ്ട്. അന്താരാഷ്ട്ര നിലവാരത്തിലുള്ള ഡാറ്റാ അനലിറ്റിക്സ് ഉപയോഗിച്ചാണ് ഇന്ത്യ ഈ നികുതി ഭരണസംവിധാനം മുന്നോട്ട് കൊണ്ടുപോകുന്നത്.
Photo and News Source: Dhanam
