മലയാളികൾ ഏറെ ആകാംക്ഷയോടെ കാത്തിരിക്കുന്ന ദുൽഖർ സൽമാൻ ചിത്രമാണ് 'ഐ ആം ഗെയിം'. തെന്നിന്ത്യയിലുടനീളമുള്ള നൂറിലധികം ലൊക്കേഷനുകളിൽ ചിത്രീകരണം പൂർത്തിയാക്കിയ ഈ ബിഗ് ബജറ്റ് ആക്ഷൻ ത്രില്ലർ ഇപ്പോൾ പോസ്റ്റ് പ്രൊഡക്ഷൻ ഘട്ടത്തിലാണ്. തന്റെ കരിയറിലെ ഏറ്റവും സ്റ്റൈലിഷ് ആയ ചിത്രമാണിതെന്ന് ദുൽഖർ സൽമാൻ തന്നെ വെളിപ്പെടുത്തുന്നു. കഥാപാത്രവും പശ്ചാത്തലവും ഏറെ ആധുനികമായാണ് സംവിധായകൻ നഹാസ് ഹിദായത് ഒരുക്കിയിരിക്കുന്നത്.
കഴിഞ്ഞ കുറച്ചു കാലമായി വിന്റേജ് വേഷങ്ങളിലാണ് താൻ പ്രേക്ഷകർക്ക് മുന്നിലെത്തിയതെന്നും, അതിൽ നിന്നെല്ലാം തികച്ചും വ്യത്യസ്തമായ ഒരു ലുക്കാണ് ഈ ചിത്രത്തിലുള്ളതെന്നും ദുൽഖർ വ്യക്തമാക്കി. സംവിധായകൻ നഹാസ് ഹിദായത്തിന്റെ കാഴ്ചപ്പാടാണ് തന്നെ ഇത്രയും സ്റ്റൈലിഷ് ആയി അവതരിപ്പിക്കാൻ സഹായിച്ചതെന്നും അദ്ദേഹം കൂട്ടിച്ചേർത്തു. വേഫെറർ ഫിലിംസിന്റെ ബാനറിൽ ദുൽഖർ സൽമാനും ജോം വർഗീസും ചേർന്നാണ് ചിത്രം നിർമിക്കുന്നത്.
ഷഹബാസ് റഷീദും ആദർശ് സുകുമാരനും ചേർന്നാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. ആർഡിഎക്സ് എന്ന സൂപ്പർഹിറ്റ് ചിത്രത്തിന് ശേഷം നഹാസ് സംവിധാനം ചെയ്യുന്ന ഈ ചിത്രം, ദുൽഖറിന്റെ കരിയറിലെ 40-ാം ചിത്രമാണ്. ആന്റണി വർഗീസ്, മിഷ്കിൻ, കയാദു ലോഹർ, കതിർ, പാർഥ് തിവാരി, സംയുക്ത വിശ്വനാഥൻ തുടങ്ങി വലിയൊരു താരനിര തന്നെ ചിത്രത്തിൽ അണിനിരക്കുന്നുണ്ട്.
ജേക്സ് ബിജോയ് സംഗീതവും അൻപറിവ് മാസ്റ്റേഴ്സ് സംഘട്ടനവും ഒരുക്കുന്ന ചിത്രം 2026 ഓഗസ്റ്റിൽ ഓണം റിലീസായി ആഗോളതലത്തിൽ തിയേറ്ററുകളിലെത്തും. മലയാളം, തമിഴ്, തെലുങ്ക്, ഹിന്ദി, കന്നഡ ഭാഷകളിൽ പാൻ-ഇന്ത്യൻ റിലീസായാണ് ചിത്രം എത്തുന്നത്. ജിംഷി ഖാലിദ് ഛായാഗ്രഹണവും ചമൻ ചാക്കോ എഡിറ്റിംഗും നിർവഹിക്കുന്നു.
Photo and News Source: Mathrubhumi
