കേരളത്തിലെ തെരഞ്ഞെടുപ്പ് ഫലങ്ങൾ പുറത്തുവരുമ്പോൾ ഭരണപക്ഷമായ എൽഡിഎഫിന് കനത്ത തിരിച്ചടി. മുഖ്യമന്ത്രി പിണറായി വിജയൻ ഉൾപ്പെടെ പത്തോളം മന്ത്രിമാർ തങ്ങളുടെ മണ്ഡലങ്ങളിൽ പിന്നിലാണെന്ന വാർത്ത എൽഡിഎഫ് ക്യാമ്പിൽ വലിയ ആശങ്കയാണ് സൃഷ്ടിച്ചിരിക്കുന്നത്. ശക്തമായ ഭരണവിരുദ്ധ വികാരം മണ്ഡലങ്ങളിൽ പ്രതിഫലിക്കുന്നുണ്ടെന്നാണ് നിലവിലെ ട്രെൻഡുകൾ സൂചിപ്പിക്കുന്നത്.
ആറന്മുളയിൽ ആരോഗ്യ മന്ത്രി വീണാ ജോർജ് കടുത്ത വെല്ലുവിളിയാണ് നേരിടുന്നത്. യൂത്ത് കോൺഗ്രസ് നേതാവ് അബിൻ വർക്കി ഇവിടെ വ്യക്തമായ ലീഡ് നിലനിർത്തുന്നു. അതുപോലെ, കഴിഞ്ഞ 25 വർഷമായി പത്തനാപുരം കൈപ്പിടിയിലൊതുക്കിയ കെ.ബി. ഗണേഷ് കുമാറിന് കോൺഗ്രസ് വക്താവ് ജ്യോതികുമാർ ചാമക്കാല കടുത്ത ഭീഷണി ഉയർത്തുന്നു.
മന്ത്രിമാരായ ഒ.ആർ. കേളു മാനന്തവാടിയിലും, പി. രാജീവ് കളമശ്ശേരിയിലും, എം.ബി. രാജേഷ് തൃത്താലയിലും, വി.എൻ. വാസവൻ ഏറ്റുമാനൂരിലും തങ്ങളുടെ എതിരാളികൾക്ക് പിന്നിലാണ്. തിരുവനന്തപുരം മുതൽ കാസർകോട് വരെയുള്ള മണ്ഡലങ്ങളിൽ പ്രകടമാകുന്ന ഈ തിരിച്ചടി എൽഡിഎഫ് നേതൃത്വത്തെ ഞെട്ടിച്ചിരിക്കുകയാണ്. അട്ടിമറികളിലൂടെ ഭരണം പിടിക്കാമെന്ന യുഡിഎഫിന്റെ പ്രതീക്ഷകൾക്ക് ഈ ട്രെൻഡുകൾ വലിയ കരുത്താണ് പകരുന്നത്.
Photo and News Source: Suprabhaatham
