പശ്ചിമേഷ്യയിൽ യുദ്ധസമാനമായ സാഹചര്യങ്ങൾ നിലനിൽക്കെ, ഇറാൻ പതാകയേന്തിയ എംടി ഹസ്ന (MT Hasna) എന്ന എണ്ണക്കപ്പലിന് നേരെ അമേരിക്കൻ സേന ആക്രമണം നടത്തി. ഗൾഫ് ഓഫ് ഒമാനിൽ വച്ചാണ് യുഎസ് സെൻട്രൽ കമാൻഡ് (CENTCOM) ഈ സൈനിക നടപടി സ്വീകരിച്ചത്. അമേരിക്ക ഏർപ്പെടുത്തിയ നാവിക ഉപരോധം ലംഘിച്ച് ഇറാനിയൻ തുറമുഖത്തേക്ക് പ്രവേശിക്കാൻ ശ്രമിച്ചതാണ് ആക്രമണത്തിന് കാരണമായി യുഎസ് അധികൃതർ ചൂണ്ടിക്കാട്ടുന്നത്.
ബുധനാഴ്ച രാവിലെ അന്താരാഷ്ട്ര സമുദ്ര മേഖലയിലായിരുന്നു സംഭവം. ഉപരോധം മറികടക്കരുതെന്ന് കപ്പലിന് പലതവണ മുന്നറിയിപ്പ് നൽകിയിരുന്നതായി യുഎസ് സെൻട്രൽ കമാൻഡ് അവകാശപ്പെടുന്നു. എന്നാൽ മുന്നറിയിപ്പുകൾ അവഗണിച്ചതോടെ, യുഎസ്എസ് അബ്രഹാം ലിങ്കൺ (USS Abraham Lincoln) വിമാനവാഹിനിക്കപ്പലിൽ നിന്ന് പറന്നുയർന്ന എഫ് എ18 സൂപ്പർ ഹോണറ്റ് (F/A-18 Super Hornet) പോർവിമാനം കപ്പലിന് നേരെ വെടിയുതിർക്കുകയായിരുന്നു.
20 മില്ലിമീറ്റർ പീരങ്കികൾ ഉപയോഗിച്ച് കപ്പലിന്റെ എൻജിൻ ഭാഗം ലക്ഷ്യം വെച്ചായിരുന്നു ആക്രമണം. ഇതോടെ കപ്പൽ പൂർണ്ണമായും പ്രവർത്തനരഹിതമായി. കപ്പലിലെ ജീവനക്കാർക്ക് ആർക്കും പരിക്കേറ്റതായി റിപ്പോർട്ടുകളില്ലെന്നും, സമുദ്രത്തിൽ എണ്ണച്ചോർച്ച ഉണ്ടായിട്ടില്ലെന്നും യുഎസ് കോസ്റ്റ് ഗാർഡും നേവിയും സംയുക്തമായി അറിയിച്ചു. നിലവിൽ കപ്പൽ ഇറാൻ തീരത്തേക്ക് നീങ്ങുന്നില്ലെന്നും യുഎസ് സ്ഥിരീകരിച്ചിട്ടുണ്ട്.
അമേരിക്കയുടെ നടപടിയെ രൂക്ഷമായി വിമർശിച്ച് ഇറാൻ രംഗത്തെത്തി. ഇത് അന്താരാഷ്ട്ര നിയമങ്ങളുടെ നഗ്നമായ ലംഘനമാണെന്നും, തങ്ങളുടെ കപ്പലിന് നേരെ നടന്നത് ക്രൂരമായ ആക്രമണമാണെന്നും ഇറാൻ ഭരണകൂടം വ്യക്തമാക്കി. ഇതിനെ 'കടൽക്കൊള്ള'യായി മാത്രമേ കാണാൻ കഴിയൂ എന്ന് വിശേഷിപ്പിച്ച ഇറാൻ, സംഭവത്തിന് തക്കതായ മറുപടി നൽകുമെന്ന് മുന്നറിയിപ്പും നൽകിയിട്ടുണ്ട്. ഇറാന്റെ സാമ്പത്തിക സ്രോതസ്സുകൾ തടയുന്നതിന്റെ ഭാഗമായി മേഖലയിൽ അമേരിക്ക കർശനമായ നിരീക്ഷണം തുടരുകയാണ്.
Photo and News Source: Suprabhaatham
