മലപ്പുറം: കേരളീയ സമൂഹം സിപിഎമ്മിന്റെയും ബിജെപിയുടെയും വർഗീയ ധ്രുവീകരണ രാഷ്ട്രീയത്തിനെതിരെ കനത്ത തിരിച്ചടി നൽകിയിരിക്കുന്നു. വെൽഫെയർ പാർട്ടി മലപ്പുറം ജില്ല പ്രസിഡണ്ട് കെവി സഫീർഷ്, നിയമസഭ തെരഞ്ഞെടുപ്പ് ഫലം ഈ തിരിച്ചടിയുടെ തെളിവാണെന്ന് അഭിപ്രായപ്പെട്ടു. എൽഡിഎഫിനെയും എൻഡിഎയെയും പരാജയപ്പെടുത്താൻ വെൽഫെയർ പാർട്ടി നടത്തിയ രാഷ്ട്രീയ ആഹ്വാനത്തെ മുഴുവൻ വോട്ടർമാരും സ്വീകരിച്ചതായി അദ്ദേഹം അഭിനന്ദിച്ചു.
മൃദുഹിന്ദുത്വത്തിലൂടെയും സാമുദായിക ധ്രുവീകരണത്തിലൂടെയും അധികാരത്തിൽ തുടരാനുള്ള സിപിഎമ്മിന്റെ ശ്രമങ്ങളെയും, സംഘപരിവാറിന്റെ വംശീയ രാഷ്ട്രീയ പദ്ധതികളെയും കേരളീയ സമൂഹം തള്ളിക്കളഞ്ഞിരിക്കുന്നു. കഴിഞ്ഞ 10 വർഷമായി കേരളം ഭരിക്കുന്ന ഇടതുപക്ഷ സർക്കാർ, ആർഎസ്എസ് ദാസ്യത്തെയും ജനവിരുദ്ധ നയങ്ങളെയും പ്രാവർത്തികമാക്കിയതിന്റെ ഫലമാണ് ഈ തിരിച്ചടി. മുസ്ലിം അപരവത്കരണത്തിലൂടെ അധികാരം നിലനിർത്താനുള്ള സിപിഎമ്മിന്റെ ഹീനമായ തന്ത്രം, കേരളീയ സമൂഹം തള്ളിക്കളഞ്ഞിരിക്കുന്നു.
ഒരു തെരഞ്ഞെടുപ്പ് തന്ത്രത്തിന്റെ മാനത്തിൽ നിന്ന് മാറി, സിപിഎമ്മിന്റെ സ്ഥായിയായ രാഷ്ട്രീയനയമായി മാറിയ സാമുദായിക ധ്രുവീകരണം, സംഘപരിവാർ ഉത്തരേന്ത്യൻ സംസ്ഥാനങ്ങളിൽ പ്രയോഗിക്കുന്ന അപരവത്കരണ രാഷ്ട്രീയത്തോട് സമാനമാണ്. ഇത് സിപിഎമ്മിന് നഷ്ടക്കച്ചവടമായെന്നും ബിജെപിയുടെ രാഷ്ട്രീയ നിക്ഷേപമായി മാറുമെന്നുമുള്ള വെൽഫെയർ പാർട്ടിയുടെ മുന്നറിയിപ്പുകൾ, തെരഞ്ഞെടുപ്പ് ഫലങ്ങളിലൂടെ സത്യമായിത്തീർന്നിരിക്കുന്നു.
ധ്രുവീകരണ രാഷ്ട്രീയത്തോടൊപ്പം തദ്ദേശ തെരഞ്ഞെടുപ്പ് വേളയിലും നിയമസഭ തെരഞ്ഞെടുപ്പ് പ്രകടന പത്രികയിലും വാഗ്ദാനം ചെയ്ത ക്ഷേമപദ്ധതികളെക്കാൾ, കേരളം കാത്തു സൂക്ഷിക്കുന്ന മതനിരപേക്ഷതയും സാമൂഹിക സഹവർത്തിത്വവുമാണ് പ്രധാനം. പണമൊഴുക്കിയുള്ള പിആർ ഗിമ്മിക്കുകളെക്കാൾ മുകളിലാണ് തങ്ങളുടെ രാഷ്ട്രീയ ബോധമെന്ന് മലയാളിസമൂഹം തെളിയിച്ചിരിക്കുന്നു.
ജനകീയ സമരങ്ങളെ ഞെരിച്ചമർത്തിയും അവകാശ സമരങ്ങളെ പൈശാചികവത്കരിച്ചും മറുചോദ്യങ്ങളെ വായടപ്പിക്കാൻ ശ്രമിച്ച 10 വർഷത്തെ ഉരുക്കുഭരണത്തെ സഹിക്കാൻ തയ്യാറല്ലെന്ന കേരളീയ സമൂഹത്തിന്റെ പ്രഖ്യാപനമാണ് ഈ തെരഞ്ഞെടുപ്പ് ഫലങ്ങൾ. മുഖ്യമന്ത്രിയടക്കമുള്ള സിപിഎമ്മിന്റെ നേതാക്കൾക്ക് കനത്ത തിരിച്ചടിയാണ് ജനങ്ങൾ നൽകിയിരിക്കുന്നത്. നരേന്ദ്ര മോദി അടക്കമുള്ള കേന്ദ്ര നേതാക്കളെ എഴുന്നള്ളിച്ചും കോർപ്പറേറ്റ് പണമൊഴുക്കിയും പ്രലോഭനവും ഭീഷണിയും അടക്കമുള്ള കെണികളൊരുക്കിയും എൻഡിഎയുടെ അംഗത്വം വർധിപ്പിക്കാമെന്ന കണക്കുകൂട്ടൽ തെറ്റാണെന്ന് തെളിഞ്ഞിരിക്കുന്നു.
Photo and News Source: Kerala Online News
