വിപണിയിൽ നിന്നും സമ്പന്ന നിക്ഷേപകർ പിന്മാറുകയാണോ? സ്മാർട്ട് മണി ഒഴുകുന്നത് എങ്ങോട്ട്?

2026 ജനുവരി-മാർച്ച് കാലയളവിൽ ഇന്ത്യൻ വിപണിയിൽ സമ്പന്ന വ്യക്തിഗത നിക്ഷേപകരുടെ (HNI) ഓഹരി വിഹിതം 2.03%-ൽ നിന്ന് 1.90% ആയി കുറഞ്ഞു. അതുപോലെ റീട്ടെയിൽ വ്യക്തിഗത നിക്ഷേപകരുടെ (RII) ഓഹരി പങ്കാളിത്തം 7.25%-ൽ നിന്ന് 7.10% ആയി ഇടിഞ്ഞു. ഈ കുറവോടെ, ഇന്ത്യൻ വിപണിയിലെ വ്യക്തിഗത നിക്ഷേപകരുടെ നേരിട്ടുള്ള ഓഹരി വിഹിതം അഞ്ച് വർഷത്തെ ഏറ്റവും താഴ്ന്ന നിലയായ 9.1% ആയി. വിദേശ നിക്ഷേപക സ്ഥാപനങ്ങൾ (FIIs) തുടർച്ചയായി ഓഹരികൾ വിറ്റൊഴിക്കുന്ന സമയത്താണ് ഈ കുറവ് രേഖപ്പെടുത്തിയത്.

എൻ.എസ്.ഇയുടെ നിഫ്റ്റി 14.5% ഇടിവ് രേഖപ്പെടുത്തിയ മാർച്ച് സാമ്പത്തിക പാദത്തിൽ, സമ്പന്ന നിക്ഷേപകർ സ്വർണം, വെള്ളി, റീറ്റ്സ് (REITs) എന്നിവയിലേക്ക് നിക്ഷേപം തിരിച്ചു. സാധാരണ നിക്ഷേപകർ, എസ്.ഐ.പി വഴി മ്യൂച്വൽ ഫണ്ടുകളിലേക്ക് നിക്ഷേപം തുടർന്നു. സമ്പന്ന നിക്ഷേപകരുടെ പിന്മാറ്റം ഉണ്ടായിട്ടും, മ്യൂച്വൽ ഫണ്ടുകളുടെ ലിസ്റ്റ് ചെയ്ത കമ്പനികളിലെ ഓഹരി വിഹിതം ഉയർന്നതായി പ്രൈം ഇൻഫോബേസ് ഡാറ്റ വെളിപ്പെടുത്തുന്നു.

Photo and News Source: Dhanam