ന്യൂയോർക്കിൽ നടന്ന ആപ്പിളിന്റെ 2026 രണ്ടാം പാദ സാമ്പത്തിക അവലോകന യോഗത്തിൽ ടിം കുക്ക് ഇന്ത്യൻ വിപണിയിലെ വളർച്ചയെക്കുറിച്ച് പ്രതിപാദിച്ചു. ഇന്ത്യയിലെ സ്മാർട്ട്ഫോൺ, പിസി വിപണികൾ ആപ്പിളിന് വലിയ അവസരമാണെന്ന് അദ്ദേഹം സൂചിപ്പിച്ചു. ലോകത്തിലെ രണ്ടാമത്തെ വലിയ സ്മാർട്ട്ഫോൺ വിപണിയും മൂന്നാമത്തെ വലിയ പേഴ്സണൽ കമ്പ്യൂട്ടർ വിപണിയുമായ ഇന്ത്യയിലെ വളർന്നുവരുന്ന മധ്യവർഗവും പുതിയ ഉപഭോക്താക്കളും കമ്പനിക്ക് അനുകൂല സാഹചര്യമൊരുക്കുന്നു. കഴിഞ്ഞ പാദത്തിൽ ആപ്പിളിന്റെ ആകെ വരുമാനം 17% വർദ്ധിച്ച് 111.2 ബില്യൺ ഡോളറായി. ഇന്ത്യയുൾപ്പെടെയുള്ള വികസ്വര രാജ്യങ്ങളിൽ ഐഫോൺ വിൽപ്പന ഇരട്ട അക്ക വളർച്ച രേഖപ്പെടുത്തി.
ഫെബ്രുവരിയിൽ മുംബൈയിലെ ബോറിവലിയിലാണ് ഇന്ത്യയിലെ ആറാമത്തെ ആപ്പിൾ സ്റ്റോർ ഉദ്ഘാടനം ചെയ്തത്. നിലവിൽ ഡൽഹി, ബാംഗ്ലൂർ, പൂനെ, നോയിഡ എന്നിവിടങ്ങളിലും ആപ്പിളിന്റെ സ്വന്തം സ്റ്റോറുകളുണ്ട്. ഐഫോണിന് പുറമെ ഐപാഡ്, മാക് കമ്പ്യൂട്ടറുകൾ എന്നിവയ്ക്കും ഇന്ത്യയിൽ വലിയ സ്വീകാര്യത ലഭിച്ചിട്ടുണ്ട്. മാക്ബുക്ക് നിയോ പോലുള്ള പുതിയ ഉൽപ്പന്നങ്ങളുടെ വരവ് ഇന്ത്യയിലെ മാക് വരുമാനത്തിൽ വലിയ വർദ്ധനവുണ്ടാക്കിയിട്ടുണ്ട്.
ടിം കുക്ക് ഈ വർഷം സിഇഒ സ്ഥാനത്തുനിന്ന് വിരമിക്കാനിരിക്കുകയാണ്. 2026 സെപ്റ്റംബർ 1-ന് ജോൺ ടെർണസ് ആപ്പിളിന്റെ പുതിയ സിഇഒ ആയി ചുമതലയേൽക്കും. വിരമിച്ച ശേഷം ടിം കുക്ക് ആപ്പിളിന്റെ ബോർഡിന്റെ എക്സിക്യൂട്ടീവ് ചെയർമാനായി തുടരുമെന്ന് പ്രഖ്യാപിച്ചു.
Photo and News Source: Sathyam Online
