ന്യൂഡൽഹിയിൽ നിന്നും അടുത്ത മാസം യൂറോപ്യൻ രാജ്യങ്ങളിലേക്ക് യാത്ര തിരിക്കാനുള്ള പ്രധാനമന്ത്രി നരേന്ദ്ര മോദിയുടെ പദ്ധതിയിൽ യു.എ.ഇയും ഉൾപ്പെടുത്തിയിട്ടുണ്ട്. മിഡിൽ ഈസ്റ്റിലെ പ്രധാന പങ്കാളിയായ യു.എ.ഇയുമായുള്ള ബന്ധം ശക്തിപ്പെടുത്തുന്നതിന്റെ ഭാഗമായാണ് ഈ ഹ്രസ്വ സന്ദർശനം.
ഇന്ത്യ-നോർവേ ഉച്ചകോടിയിൽ പങ്കെടുക്കുന്നതിനായി ആദ്യം നോർവേയിലേക്ക് യാത്ര തിരിക്കും. തുടർന്ന് നെതർലൻഡ്സ്, സ്വീഡൻ, ഇറ്റലി എന്നീ രാജ്യങ്ങളിലും സന്ദർശനം നടത്തും. യാത്രയുടെ മടക്കയിലോ ഇടയിലോ യു.എ.ഇ സന്ദർശനം ഉൾപ്പെടുത്താനാണ് നിലവിലെ നീക്കം.
യു.എ.ഇയുമായുള്ള തന്ത്രപ്രധാനമായ സഹകരണം വര്ധിപ്പിക്കുന്നതിൽ ഈ സന്ദർശനം നിർണ്ണായകമാകുമെന്ന് വിശ്വസിക്കപ്പെടുന്നു. പ്രതിരോധം, വ്യാപാരം തുടങ്ങിയ മേഖലകളിലെ സഹകരണം കൂടുതൽ ശക്തമാക്കാനും ഈ കൂടിക്കാഴ്ച സഹായിക്കുമെന്നാണ് വിലയിരുത്തൽ.
യു.എ.ഇ പ്രസിഡന്റുമായി പ്രധാനമന്ത്രി ഇതിനോടകം രണ്ട് തവണ ഫോണിൽ സംസാരിച്ചിരുന്നു. സന്ദർശനം സ്ഥിരീകരിക്കുന്നതോടെ ഔദ്യോഗിക യാത്രാവിവരങ്ങൾ വിദേശകാര്യ മന്ത്രാലയം പുറത്തുവിടും. ഗൾഫ് രാജ്യങ്ങളുമായുള്ള ഇന്ത്യയുടെ സൗഹൃദം ഊട്ടിയുറപ്പിക്കാനും ഈ നീക്കം സഹായിക്കുമെന്ന് നയതന്ത്ര വിദഗ്ദ്ധർ അഭിപ്രായപ്പെടുന്നു.
Photo and News Source: Janam TV
