തമിഴ്നാട് നിയമസഭാ തിരഞ്ഞെടുപ്പ് ഫലം പ്രതീക്ഷിക്കുന്നതിനിടെ, വിജയ് നായകനാകുന്ന ‘ജനനായകൻ’ മേയ് എട്ടിന് ലോകമെമ്പാടും റിലീസ് ചെയ്യുമെന്ന് റിപ്പോർട്ടുകൾ വ്യക്തമാക്കുന്നു. സെൻസർ ബോർഡുമായുള്ള നീണ്ട പോരാട്ടത്തിനുശേഷമാണ് ചിത്രം തിയേറ്ററുകളിലെത്തുന്നത്. 2026 ജനുവരിയിലായിരുന്നു ആദ്യം റിലീസ് നിശ്ചയിച്ചിരുന്നത്. 100 കോടി രൂപയിലധികം അഡ്വാൻസ് ബുക്കിംഗും ഉണ്ടായിരുന്നു. എന്നാൽ സെൻസർ പ്രശ്നങ്ങളെ തുടർന്ന് റിലീസ് മാറ്റിവെക്കേണ്ടി വന്നു. അടുത്തിടെ ചിത്രം ഓൺലൈനിൽ ചോർന്നെങ്കിലും വിജയ്യുടെ താരമൂല്യം ചിത്രത്തിന് വൻ ബോക്സ് ഓഫീസ് വിജയം നേടാൻ സഹായിക്കുമെന്ന് പ്രതീക്ഷിക്കുന്നു.
പൂർണസമയം രാഷ്ട്രീയത്തിലേക്കിറങ്ങുന്നതിന് മുന്നോടിയായി വിജയ് നായകനാകുന്ന അവസാന ചിത്രമാണിത്. വിജയ്യുടെ രാഷ്ട്രീയ പ്രവേശനം സിനിമയുടെ പ്രകടനത്തെ എങ്ങനെ ബാധിക്കുമെന്നത് സിനിമാ ലോകം ഉറ്റുനോക്കുന്നു. വിജയ്യെ വെള്ളിത്തിരയിൽ അവസാനമായി കാണാനുള്ള ആവേശത്തിലാണ് ആരാധകർ.
ചിത്രത്തിന്റെ സംഗീത സംവിധാനം അനിരുദ്ധ് നിർവഹിക്കുന്നു. ഒരു മുൻ പോലീസ് ഉദ്യോഗസ്ഥന്റെ വേഷത്തിലാണ് വിജയ് എത്തുന്നത്. ബോളിവുഡ് താരം ബോബി ഡിയോളാണ് പ്രധാന വില്ലനായി അഭിനയിക്കുന്നത്. പൂജ ഹെഗ്ഡെ നായികയായും എത്തുന്നു. മമിത ബൈജു, ഗൗതം വാസുദേവ് മേനോൻ, പ്രകാശ് രാജ്, പ്രിയാമണി, നരേൻ തുടങ്ങിയവരും ചിത്രത്തിൽ അണിനിരക്കുന്നു.
Photo and News Source: Mathrubhumi
