'ചില സ്വപ്നങ്ങൾക്ക് സമയമെടുക്കും, തിരിച്ചുവരവ് അത്ര എളുപ്പമായിരുന്നില്ല'; ആ​ഗ്രഹം പൂർത്തിയാക്കിയതിനെക്കുറിച്ച് നീരജിന്റെ ഭാര്യ

നടൻ നീരജ് മാധവിയുടെ ഭാര്യ ദീപ്തി ജനാർദ്ദനൻ, വർഷങ്ങൾക്കുമുമ്പ് കോളജ് കാലഘട്ടത്തിൽ പരാജയപ്പെട്ട ഐഐഎം പ്രവേശന സ്വപ്നം ഇപ്പോൾ നിരന്തര പരിശ്രമത്തിലൂടെ നേടിയെടുത്തതിൽ സന്തോഷത്തിലാണ്. ഇൻസ്റ്റഗ്രാമിലൂടെ പങ്കുവച്ച കുറിപ്പിലൂടെ ശ്രദ്ധേയയായി. കോളജ് കാലത്ത് ക്യാറ്റ് പരീക്ഷ വിജയിക്കാതെ വന്നതോടെ സ്വപ്നം ഉപേക്ഷിച്ച ദീപ്തി, വർഷങ്ങൾക്കുശേഷം അത് വീണ്ടും വേട്ടയാടിയപ്പോൾ നേടിയെടുക്കാൻ തീരുമാനിച്ചു. ‘‘ചില സ്വപ്നങ്ങൾ നമ്മെ വിട്ടുപോകില്ല. അവ ശാന്തമായി കാത്തിരിക്കും. കോളജ് കാലത്ത് ഐഐഎമ്മിൽ പഠിക്കണമെന്ന ആഗ്രഹം ഉണ്ടായിരുന്നു.

ക്യാറ്റ് പരീക്ഷ വിജയിക്കാതെ വന്നതോടെ ജോലിയിലേക്കും സുരക്ഷിത ജീവിതത്തിലേക്കും ഒതുങ്ങിപ്പോയി. ദിവസങ്ങൾ വർഷങ്ങളായി മാറി. ഒടുവിൽ സ്വപ്നത്തിന് വീണ്ടും ചെവികൊടുക്കാൻ തീരുമാനിച്ചു. തിരിച്ചുവരവ് എളുപ്പമായിരുന്നില്ല. പരിചിത സാഹചര്യങ്ങളിൽ നിന്ന് പുറത്തുകടക്കാൻ സംശയങ്ങളെ നേരിടേണ്ടി വന്നു,’’ എന്ന് ദീപ്തി കുറിച്ചു.

Photo and News Source: Samakalika Malayalam