ന്യൂഡൽഹിയിൽ വച്ച്, ഹോണ്ട കാർസ് ഇന്ത്യ തങ്ങളുടെ പ്രീമിയം സെഡാനായ ഹോണ്ട സിറ്റിയുടെ പുതുക്കിയ പതിപ്പ് മെയ് 22-ന് വിപണിയിലെത്തിക്കുമെന്ന് പ്രഖ്യാപിച്ചു. അഞ്ചാം തലമുറ സിറ്റിയെത്തുടർന്നുള്ള ഏറ്റവും വലിയ അപ്ഡേറ്റാണിത്. വിപണിയിൽ ഫോക്സ്വാഗൺ വിർറ്റസ്, സ്കോഡ സ്ലാവിയ, ഹ്യുണ്ടായ് വെർണ എന്നിവയുമായി മത്സരിക്കാനാണ് ഈ പുതിയ ഫെയ്സ്ലിഫ്റ്റ് പതിപ്പിലൂടെ കമ്പനി ലക്ഷ്യമിടുന്നത്.
പുതിയ 2026 മോഡലിൽ ഡിസൈനിൽ ആകർഷകമായ മാറ്റങ്ങൾ പ്രതീക്ഷിക്കുന്നുണ്ട്. പരിഷ്കരിച്ച ബമ്പറുകൾ, ഹെഡ്ലാമ്പുകൾ, ടെയിൽ ലാമ്പുകൾ, പുതിയ ഡിസൈനിലുള്ള അലോയ് വീലുകൾ എന്നിവ ഇതിൽ ഉൾപ്പെടും. കാറിന്റെ സിലൗറ്റ് പഴയതുപോലെ തുടരുമെന്ന് റിപ്പോർട്ടുകൾ സൂചിപ്പിക്കുന്നു.
അകത്തളത്തിലാണ് പ്രധാന മാറ്റങ്ങൾ. വലിയ ടച്ച്സ്ക്രീൻ ഇൻഫോടെയ്ൻമെന്റ് യൂണിറ്റ്, ഫുൾ ഡിജിറ്റൽ ഇൻസ്ട്രുമെന്റ് ക്ലസ്റ്റർ, പവർഡ് ഡ്രൈവർ സീറ്റ്, വെന്റിലേറ്റഡ് ഫ്രണ്ട് സീറ്റുകൾ എന്നിവ ഉൾപ്പെടുത്തിയിരിക്കുന്നു. 360 ഡിഗ്രി ക്യാമറയും പരിഷ്കരിച്ച എ ഡി എ എസ് ഫീച്ചറുകളും സുരക്ഷ വർദ്ധിപ്പിക്കും. പുതിയ അപ്ഹോൾസ്റ്ററിയും ഇന്റീരിയറിന് പുതുമ നൽകും.
എഞ്ചിനിൽ മാറ്റമുണ്ടാകില്ല. നിലവിലുള്ള 1.5 ലിറ്റർ ഐ വിടിഇസി പെട്രോൾ എഞ്ചിനും 1.5 ലിറ്റർ ഹൈബ്രിഡ് പവർട്രെയിനും തുടരും. മാനുവൽ, സി വി ടി ട്രാൻസ്മിഷൻ ഓപ്ഷനുകളും ലഭ്യമാകും.
Photo and News Source: Siraj Live
